Qyzdar arasynda kúresten sońǵy lıtsenzııalyq týrnırge baratyn quramany ózgerttik — bas bapker

ASTANA. KAZINFORM — Kúres túrlerinen sońǵy irikteý týrnıri Túrkııada 9-12 mamyr kúnderi ótedi. Bul — bizge berilgen sońǵy múmkindik. Ótkende Bishkekte qazaqstandyq qyzdar joldamaǵa qol jetkize almady. Sondyqtan osy joly joldamaǵa talasatyn balýan qyzdardyń quramy jańartyldy. Bul týraly Kazinform tilshisine áıelder kúresinen bas bapker Qaırat Saǵadıev aıtyp berdi.

«Bishkekte ótken Azııa aımaqtyq irikteý týrnırinen keminde 2-3 joldama alamyz dep úmittendik. Ókinishke qaraı olaı bolmady. Bastap barǵan balýan qyzdarymyz túgelimen fınalǵa shyǵa almady. Endi alda 9-12 mamyr kúnderi Túrkııada sońǵy álemdik irikteý týrnıri ótedi. Bul — bizge berilgen eń sońǵy múmkindik. Sosyn bapkerler quramy aqyldasa kele Bishkekte joly bolmaǵan qyzdardan tek 50 kelide Laýra Ǵanıqyzy men 62 kelide Irına Kýznetsovany ǵana qaldyrdyq. Qalǵan salmaqta Azııa aımaqtyq týrnırine barmaǵan qyzdarymyzǵa múmkindik berip otyrmyz», — dedi bas bapker.

Bul joly bas bapker Túrkııadaǵy álemdik týrnırge 50 kelide Laýra Ǵanıqyzyna, 53 kelide Marına Sednevaǵa, 57 kelide Laýra Almaǵanbetovaǵa, 62 kelide Irına Kýznetsovaǵa, 68 kelide Elena Shalygınaǵa jáne 76 keli salmaqta Elmıra Syzdyqovaǵa úmit artyp otyrǵanyn jetkizdi.

Esterińizge sala keteıik, osyǵan deıin áıelder kúresinen Ystanbulda ótetin sońǵy irikteý týrnırine kimder baratynyn habarlaǵan edik.