«Qyz Jibek» fılmindegi kamzoldardyń biri mýzeı qorynda saqtaýly — mınıstrlik
ASTANA. KAZINFORM — Mádenıet jáne aqparat mınıstrligi áleýmettik jelilerde talqylanyp jatqan prodıýser Baıan Alagózovanyń «Qyz Jibek» fılmindegi kıimine qatysty jarııalaǵan jazbasyna baılanysty túsinikteme berdi.
— «Qazaqfılm» kınostýdııasynyń mýzeı qorynda «Qyz Jibek» fılminde paıdalanylǵan bir kamzoldyń túpnusqasy saqtaýly. Bul jádiger ulttyq kıno óneriniń mańyzdy mádenı murasy retinde qorǵalǵan. Al prodıýser jarııalaǵan jazbadaǵy ekinshi kamzoldyń jeke qolǵa qalaı ótkendigi anyqtalyp jatyr, — delingen mınıstrlik habarlamasynda.
Sonymen qatar, vedomstvo atap ótkendeı, «Qazaqfılm» kınostýdııasy ulttyq fılmderde paıdalanylǵan qundy rekvızıtterdi, kostıýmder men basqa da tarıhı mańyzy bar zattardy júıeli túrde jınaqtap, qalpyna keltirý jáne saqtaý jumystaryn júrgizip keledi. Bul baǵyttaǵy jumys ulttyq mádenı murany keleshek urpaqqa jetkizýge baǵyttalǵan.
— Qazirgi ýaqytta «Qazaqfılm» janynan zamanaýı talaptarǵa saı keletin aýqymdy mýzeı ashý josparlanyp otyr. Atalǵan mýzeıde otandyq kıno tarıhyna qatysty biregeı eksponattar qoıylyp, kelýshilerge keńinen tanystyrylatyn bolady, — delingen habarlamada.
Mınıstrlik mádenı qundylyqtardy saqtaý jáne qorǵaý máselesine erekshe mán beretinin, sondaı-aq qoǵamda týyndaǵan suraqtarǵa ashyq ári naqty aqparat berýge árdaıym daıyn ekenin atap ótedi.
Osyǵan deıin Qyz Jibek beınesin somdaǵan Merýert Ótekeshova BQO-nyń qurmetti azamaty atanǵanyn jazǵan edik.
