Qyz Jibek beınesin somdaǵan Merýert Ótekeshova BQO-nyń qurmetti azamaty atandy
ORAL. KAZINFORM — Belgili teatr jáne kıno aktrısasy, Qazaqstannyń eńbek sińirgen ártisi, «Qurmet» jáne «Parasat» ordenderiniń ıegeri Merýert Ótekeshovaǵa Batys Qazaqstan oblysynyń qurmetti azamaty ataǵy berildi.

Osyǵan oraı týǵan jerine kelgen óner qaıratkerine marapat tabys etildi.
Merýert Qarataıqyzy ózin syılap, qurmettegeni úshin Batys Qazaqstan oblysy jurtshylyǵyna shynaıy rızashylyǵyn bildirdi.
Merýert Ótekeshova 1951 jyldyń 25 aqpanynda Oral qalasynda dúnıege kelgen.
1969-1973 jyldary Qazaq memlekettik Qurmanǵazy atyndaǵy óner ınstıtýtynyń teatr fakýltetinde oqydy.
1973 jyly M. Áýezov atyndaǵy qazaq memlekettik akademııalyq drama teatrynyń akterlik quramyna qabyldandy.
Merýert Ótekeshova teatr men kınoda kóptegen rólderdi somdady. Sonyń ishinde «Qyz Jibek» kınofılmindegi Qyz Jibek beınesimen keńinen tanyldy.
BQO máslıhatynyń sheshimimen sondaı-aq memlekettik qyzmet salasynda uzaq jyl qyzmet atqarǵan Mırbolat Jaqypov pen Tabylǵalı Saparovqa da «Batys Qazaqstan oblysynyń qurmetti azamaty» ataǵy berildi.
Eske sala keteıik, budan buryn Qaraǵandyda Merýert Ótekeshovanyń mereıtoıyna arnalǵan kórme ashylǵanyn jazǵan bolatynbyz.