«Qyz Jibek» ansambli Túrkııada halyqaralyq baıqaýda jeńimpaz atandy

ORAL. KAZINFORM — Túrkııanyń Chanakkale qalasynda 14-18 tamyz aralyǵynda ótken VIII International Troia Danse and Musik Competetion festıval-baıqaýynda Kaztalov aýdanynyń úlgili «Qyz Jibek» dástúrli ánshiler ansambli úzdik atandy.

Atalmysh halyqaralyq dodaǵa álemniń 20-dan astam elinen úmitkerler qatysyp, baq synady.

Bul joly Baıan Qabıeva men onyń uly Asylhan Boltanov jetekshilik etetin «Qyz Jibek» ansambliniń 14 oqýshydan quralǵan kishi toby óner kórsetip, jalǵyz bas júldege ıe boldy.

Tanymal ánshi-termeshi, sazger-ustaz, «Eren eńbegi úshin» medaliniń ıegeri Baıan Qabıevanyń Kazinform tilshisine málim etkenindeı, ansambl bas júldege qosa úzdik kostıými úshin marapattaldy.

«Taǵy bir aıta ketetin jaıt, qazan aıynda Máskeý qalasynda Reseıdiń halyq ártisi Nadejda Babkına teatrynda ótetin halyqaralyq baıqaýǵa tegin joldama aldyq. Oǵan dúnıejúzi elderinen úzdik jas ónerpazdar kelip, ozyp shyqqandary Kremlde óner kórsetedi. Osymen Izmır men Sakarıaǵa, Chanakkalege úshinshi ret baryp jatyrmyz. Buǵan deıin birinshi oryn alsaq, bul joly Gran-prıge qol jetkizdik. Túrik halqy Qazaqstan dese, eleń ete qalady eken. Yqylastary erekshe, kórermender qatary da qalyń. Chanakkale qalasynyń basshysy bizdi qabyldap, qurmet kórsetti. Buryn kásipkerler demeýshilik bildirse, osy joly qajetti qarjyny ata-analar taýyp berdi. Aýdan ákimi Aslanbek Sarqulov saparymyzdyń barysyn qadaǵalap otyrdy. Jol qıyndyqtary da bolmaı qalǵan joq. Jalpy, bolashaqta osyndaı festıvalderge barýǵa bıýdjet arqyly da qoldaý kórsetilse eken», deıdi Baıan Qubaıqyzy.

Onyń aıtýynsha, «Qyz Jibek» ansambli aldymen túriktiń besik jyryn, sodan keıin Asylhan Boltanovtyń «Qazaq eli jasasyn!» ánin oryndady. Ekinshi kúni «Aǵaısha», «Sáýlem-aı» halyq ánderin áýeletti.

«Ansambl músheleriniń biri Alına Sultan túrik tilin tym-táýir meńgergen. Bıyl Qaraózen mektep-lıtseıiniń 11-synybyna barady. Mende alty jyl oqyp, terme synybyn bitirdi. Bolashaqta dástúrli ánshi bolýdy maqsat etip otyr. Osyndaı shákirtterimiz az emes», dedi B.Qabıeva.

«Meniń túrik tilýin bilýim jergilikti halyqpen áńgimelesýge jaqsy boldy. Ónerimizdiń arqasynda el kórdik, jer kórdik. Osyndaı múmkindikti jasaǵan ustazdarymyzǵa, ata-anamyzǵa alǵysymyzdy aıtamyz», dedi Alına Sultan.

Eske sala keteıik, budan buryn qazaqstandyq ansambldiń Túrkııada ótken halyqaralyq baıqaýda birinshi oryn alǵanyn jazǵan bolatynbyz.