Qyz jasaýyna Túrkııa, Grýzııa, Brazılııadan tapsyrys kóp túsedi – qyzylordalyq tiginshi
QYZYLORDA. KAZINFORM – Qyzylordada burynǵy muǵalim 17 jyldan keıin birjola kásipke bet burdy. Búginde ol eksklıýzıvti qyz jasaýyn tigip júr.
Janar Prekeeva biraz jyl bilim salasynda eńbek etken. Eńbek jolyn bızneske burǵanyna esh ókinbeıdi. Muny kezdeısoq tańdaý deýge kelmeıdi.
– 2017 jyly muǵalimder bilim jetildirý maqsatynda Anglııaǵa bardyq. Sol sapar ómirimdi ózgertti desem bolady. Sodan bastap mende «qazaqtyń qolónerin nege shet elde tanytpasqa?!» degen oı týdy. Ózim balalardy tiginshilikke oqytqanmyn, qolymnan keletin is. Elge kelgesin eshteńege qaramastan oıymdy iske asyrýǵa kirisip kettim. Men basqalar sııaqty kásipti nólden bastaǵan joqpyn. Sol kezde 17 mln teńge qaryzym bar-tuǵyn. Sóıte tura, 20 myń teńgege eski tigin mashınasyn satyp alyp, birte-birte aıaqqa turdym, - dedi kásipker.
Qazir ol basqaratyn tsehta 15-ten astam adam jumys istep jatyr. Olar qyz jasaýyn ǵana emes, ulttyq úlgidegi kórpe-jastyqtar men sándi jıyntyqtardy da tigedi.
– Dızaınyn túgel ózim syzamyn. Elimizdiń batys óńirinen, tipti alys-jaqyn shet elderden tapsyrys bretinder óte kóp. Ózbekstan, Qyrǵyzstan, Túrkııa, Grýzııa, Brazılııa sekildi memleketterde turatyn qazaqtar kádesyıdan bastap kórpe-jastyqqa deıin aldyrady. Óıtkeni shet elde qolóner jumysy bolǵan soń mundaı eńbek joǵary baǵalanady. Tigip bitirgen dúnıemiz sol kúni-aq ótip ketedi, - dedi Janar Prekeshova.
Jýyrda Mádenıet jáne aqparat mınıstri Aıda Balaeva kreatıvti ındýstrııany tsıfrlandyrýǵa arnalǵan Úkimet otyrysynda qolónershiler eń kóp shoǵyrlanǵan óńirlerdi atady.