Qyz uzatý toıyndaǵy jappaı ýlaný: Pavlodar polıtsııasy qylmystyq is qozǵady

PAVLODAR. KAZINFORM - Pavlodarda qyz uzatý toıyndaǵy tamaqtan jappaı ýlaný oqıǵasyna qatysty polıtsııa qylmystyq is qozǵady. Meıramhana sanıtarlyq erejeler men gıgıenalyq normatıvterdi saqtamaǵan delinip otyr.

Pavlodar qalasynyń prokýratýrasy sanıtarlyq dárigerler meıramhanaǵa baryp, epıdemıologııalyq tekserý júrgizgenderin habarlady. Kásipkerlik nysanynyń ıesine kemshilikterdi joıý týraly uıǵarym berilgen. Al toıda dastarhanǵa qoıylǵan tamaq ónimderi boıynsha zerthanalyq zertteý nátıjeleri qylmystyq isti ashýǵa negiz bolǵan.

- Qalalyq polıtsııa basqarmasynyń ortalyq bólimi meıramhanaǵa qatysty Qylmystyq kodekstiń 304-baby, 1-bóligi boıynsha sotqa deıingi tergep-tekserýdi bastady. Qazirgi ýaqytta tergeý is-sharalary júrgizilip, jábirlenýshilerden jaýap alynyp jatyr. Tıisti saraptamalar taǵaıyndaýlar týraly másele sheshilip jatyr,-dep habarlady Pavlodar qalasynyń prokýratýrasynan.

Eske sala keteıik, Pavlodarda qyz uzatý dastarhanynan keıin 33 adam ýlandy.

Keıin meıramhana ruqsatsyz jumys istegeni anyqtaldy.