Kıiz úıden shabyt alǵan: Norman Foster Medeý men Kók Jaılaý stantsııalaryn jobalady
ASTANA. KAZINFORM — Almaty mańynda salynatyn Almaty Superski taý kýrorty jylyna myńdaǵan týrısti qabyldaıtyn iri týrıstik ortalyqqa aınalmaq. Joba aıasynda 60 shaqyrym shańǵy trassasy men 11 zamanaýı aspaly jol salynady. Zeınetkerler, balalar jáne múmkindigi shekteýli jandar aspaly jolda tegin saparlaı alady. Kazakh Tourism Development (KTD) Bas atqarýshy dırektory Erjan Erkinbaev Almaty Superski taý kýrortynyń egjeı-tegjeıin baıandady.
Onyń aıtýynsha, taý kýrortynda barlyǵy 60 shaqyrym taý-shańǵy trassasyn salý kózdelgen. Onda kúnine 10 myńnan astam kelýshi shańǵy tebe alady.
— Kýrorttyń barlyq trassasynyń 70 paıyzy jasyl jáne kók kategorııaly, ıaǵnı balalar men jańadan bastaǵan shańǵyshylarǵa óte yńǵaıly. Álemniń barlyq kýrorttarynda bundaı kórsetkish joq dep tolyq aıta alamyz, — dedi E. Erkinbaev búgingi Úkimet otyrysynda.
Sonymen birge, aspaly joldardyń sapasyna ári onyń barlyq azamattarǵa qoljetimdi bolýyna úlken basymdyq berilmek. Sol úshin ony salýǵa 90 jyldyq tarıhy bar, 90 elde 8 myńǵa jýyq jobany júzege asyrǵan ROMA atty frantsýz kompanııasy tańdalǵan.
— Biz joba aıasynda 11 aspaly jol salamyz. Barlyǵy zamanaýı, keń ári jaıly kabınalar bolady. Basty maqsat — taýdy ár azamatqa qoljetimdi qylý. Eńkeıgen qarııadan, eńbektegen balany jetektegen ana da, múmkindigi shekteýli jan da tómengi Medeýdegi stantsııadan 3400 metrdegi Qumbel shyńyna esh kedergisiz jete alady. Bul aspaly joldarmen zeınetkerler, balalar jáne múmkindigi shekteýli jandar tolyǵymen tegin júredi, — dep tolyqtyrdy spıker.
Kýrorttyń kelbeti sanalatyn Medeý jáne Kók Jaılaý stantsııalarynyń sáýletin álemge áıgili Norman Fosterdyń bıýrosy (Foster + Partners) jasaǵan. Ǵımarattyń basty ereksheligi — keń panoramalyq terrasalar bolmaq. Munda kelýshiler Almaty qalasyn jáne Іle Alataýynyń ásem kórinisterin taý basynan tamashalaı alady.
— Arhıtektorlar qazaqtyń kıiz úıinen shabyt alyp, stantsııalardyń dızaınyn qazaqı stılge keltirgen. Konstrýktsııalar kıiz úıdiń keregesi men ýyqtaryna uqsatyp jasalǵan. Al joǵarǵy jaryq túsiretin elementter shańyraq ıdeıasyn beıneleıdi. Ulttyq naqysh pen zamanaýı sáýlet úılesken biregeı nysandar salynady, — dedi E. Erkinbaev.
Barlyq ǵımarat ekologııalyq stılde aǵashtan jasalady. Konstrýktsııalardy jobalaý men óndirýmen álemge áıgili kanadalyq StructureCraft kompanııasy aınalysady. Masshtabty qurylys bolmaıdy, barlyq ǵımarattar jınalyp, qurastyrylatyn konstrýktsııalar bolady.
— Jobanyń basty basymdyqtarynyń biri — balalarǵa jaǵdaı jasaý. Qazir Almaty ákimdigimen birlesip, kýrort aýmaǵynda oqýshylarǵa dene shynyqtyrý sabaqtaryn ótkizý máselesi pysyqtalýda. Mundaı tájirıbe týrızmi damyǵan Eýropa elderinde keńinen qoldanylady. Mysaly, Aýstrııada jyl saıyn mektep baǵdarlamalary sheńberinde 80 myńnan astam bala shańǵy sportymen aınalysady, Shveıtsarııada 128 myńnan astam oqýshy qysqy sporttyq-saýyqtyrý baǵdarlamalarymen qamtylǵan. Frantsııa men Italııada mektep oqýshylarynyń taý shańǵysy kýrorttaryna barýyn qoldaıtyn memlekettik baǵdarlamalar bar, — dedi Kazakh Tourism Development ókili.
Almaty Superski jyl boıy jumys isteıtin álemdegi jańa destınatsııaǵa aınalady. Qazir Kók Jaılaý shatqalynda jaıaý júrý joldarynyń jáne taýdaǵy velo-marshrýttardyń keshendi jospary ázirlenip jatyr. Bul óz kezeginde kýrortqa 12 aı boıy otandyq qana emes, álemdik týrıstter tarapynan suranys bolatynyn kórsetedi.
— Qurylys bastalǵanda myńdaǵan, al joba aıaqtalǵanda 5 myń jumys ornyn ashý josparda bar. Bir týrızm salasy ekonomıkanyń 50 salasyna serpilis beredi. Sondyqtan kýrorttyń irgesinde, 20 mınýttyq jerdegi Almaty qalasynyń týrızm baǵytyndaǵy — qonaqúı, tamaqtaný, mýzeı, kólik tasymaly jáne basqa da salanyń boıyna qan júgireri anyq, — deıdi Erjan Erkinbaev.
Buǵan deıin Premer-mınıstrdiń orynbasary — mádenıet jáne aqparat mınıstri Aıda Balaeva Almaty Superski jobasynyń Qazaqstannyń týrızm salasyn damytýdaǵy mańyzyn atap ótken edi.
