Qys mezgilinde avtojoldardaǵy qozǵalysqa 2 myńǵa jýyq shekteý engizilgen
ASTANA. KAZINFORM — 3 700 shaqyrym bolatyn avtojoldarda ortasha jóndeý jumystary bastaldy. Bul týraly «Qazavtojol» UK» AQ basqarma tóraǵasy Darhan Imanashev málim etti.
— 2025–2026 jylǵy qysqy kezeń kúrdeli kún raıymen erekshelendi. Bul jaǵdaı joldardy kútip ustaý jumystaryn qıyndatyp, kóktaıǵaq pen qar úıindileriniń paıda bolýyna áser etti. Osynyń nátıjesinde joldaǵy qozǵalysqa 1 994 shekteý engizildi. Bul óz kezeginde 2024 jylmen salystyrǵanda (830 shekteý) 2,5 esege kóp. Qaýipsiz qozǵalysty qamtamasyz etý úshin 3 073 tehnıka jumyldyryldy, — dedi Darhan Imanashev Ortalyq kommýnıkatsııalar qyzmetindegi baspasóz máslıhatynda.
Onyń aıtýynsha, qys mezgilinde shamamen 386 myń tekshe metr kóktaıǵaqqa qarsy materıal paıdalanyldy. Sonymen qatar, jabyq jol ýchaskelerinde 711 myń avtokólikti ótkizýge jaǵdaı jasalyp, 2,4 myń adamǵa kómek berildi. Máselen, 2024–2025 jylǵy qysta 452 myń avtokólik ótkizilip, 8,2 myń adamǵa kómek kórsetilgen.
— Qazirgi kezde joldardyń sapasyn jaqsartý jáne qaýipsizdigin arttyrýǵa baǵyttalǵan keshendi baǵdarlama júzege asyrylyp jatyr. 2026 jyly 176,5 myń sharshy metr aýmaqta shuńqyrlardy jóndeý, 24 myń shaqyrymnan astam jolǵa tańba salý, sondaı-aq 10,7 myń sharshy metrden astam aýmaqta joldaǵy aqaýlardy joıý josparlanǵan. Sonymen qatar 24 myńnan astam jol belgisin ornatý jáne jańartý, shamamen 5 myń sıgnaldyq baǵana jáne 2,8 myń boılyq metrden astam qorshaý ornatý kózdelgen. Budan bólek, jalpy uzyndyǵy 3 700 shaqyrym bolatyn avtojoldarda ortasha jóndeý jumystary bastaldy. Qazirgi kezde jumystar Jetisý, Almaty, Jambyl jáne Túrkistan oblystarynyń aýmaqtarynda júrip jatyr, — dedi kompanııa basshysy.
Buǵan deıin habarlanǵandaı, elde sý tasqyny qaýpi bar jol ýchaskeleri azaıdy.
