Qyz-kelinshekter merekede alǵan gúlderin jappaı satyp jatyr
ASTANA. KAZINFORM – Qyz-kelinshekter 8 naýryz merekesine oraı syıǵa alǵan gúlderin jappaı satyp jatyr.
Jeke jarnamalarǵa arnalǵan olx.kz saıtynda jańa jáne qoldanylǵan gúlderdiń satylatyny týraly habarlandyrý kóp. Máselen, saıttyń orys tilindegi nusqasynda 1 myńnan astam, al qazaqtildi nusqasynda 500-den astam gúl satylatyny týraly jarnama ornalastyrylǵan.
Satylymǵa shyǵarylǵan gúlderdiń basym bóligine «qoldanylǵan» degen belgi qoıylypty. Qoldanylǵan gúlderdiń barlyǵy derlik búgin tańerteńnen bastap satylymǵa shyǵarylǵan. Olardyń arasynda bazardan alynǵan gúldermen qatar elıtaly saýda oryndarynan alynǵan býketter de bar.
Máselen 25 tal raýshan gúli 8 teńgege baǵalanǵan. Al dál osyndaı býkettiń baǵasy keshe 20-25 myń teńge bolǵan edi. Jalpy jarnama saıtyndaǵy qoldanylǵan gúlderdiń baǵasy - 3 myń teńge men 35 myń teńgeniń aralyǵynda.
Osyǵan oraı jarnama ıeleriniń bir-ekeýine habarlasyp ta kórgen edik.
«Keshe súıiktim merekege oraı qymbat gúl shoǵyn syıǵa tartqan edi. Oılana kele arzandaý baǵaǵa sataıyn dep sheshtim. Múmkin, keshe súıiktisine gúl alyp úlgermegen ne búgin jaqyndarynyń birine gúl izdegen bireý satyp alyp qalar. Býket óte ádemi, sol qalpynda», - dedi Symbat esimdi boıjetken.
Taǵy bir jarnama ıesi 8 naýryzǵa oraı birneshe gúl shoǵyn alǵanyn, áli sol kúıinde turǵan gúlderdi qoqysqa tastaýǵa qımaıtynyn aıtady.
«Mereke kúnine qaraǵanda baǵasyn 2 esege arzan beremin. Gúlder óte ádemi. Kez kelgen adamnyń kóńilinen shyǵady», - deıdi keıipkerimiz.
