Kıiz qaıta suranysqa ıe — aqtóbelik sheber
AQTÓBE. KAZINFORM — Aınagúl Alıeva bala kúninen qolónerge jaqyn. Ol ájesinen kórgenin oıǵa túıip, boıyna darytty. Qazir sheber qolynan shyqqan dúnıeni kórsetip, el ishindegi kórmelerge qatysyp júr. Ári kıizden jasalǵan kez kelgen buıymǵa qaıta suranys artqan.
Aqtóbe oblysy Yrǵyz aýdany Qurylys aýylynyń turǵyny uzaq jyldar boıy mádenıet úıinde kishi qyzmetker bolyp eńbek etti. Jumysy onyń súıikti isine esh kedergi keltirmedi. Tipti qosymsha tabys kózine aınaldy ári ulttyq ónerdi dáriptep júr.
— Qoıdy toǵytyp, keıin júnin qyrqyp alamyz. Shóbinen, shoǵaınasynan aryltyp, tazartamyz. Sodan keıin týlaqqa salyp sabap, birkelke qalypqa túseremiz. Ony shıge jaıyp, kıiz basamyz. Bul kıiz basýdyń joly. Bir qaraǵanda ońaı bolǵanymen birneshe kúnge sozylatyn protsess. Júndi daıyndaý úshin bir aptaǵa jýyq ýaqyt qajet. Al kıiz, tekemet basý kólemi men oıý-órnegine qaraı 5-6 saǵatty qajet etedi. Bir adam emes, qatar júrgen aýyldastarymmen birge basamyz kıizdi, — dedi sheber.
Qazirgi kezde kıizden er toqymnan bastap, kóliktiń matoryna jabý daıyndaıdy. Buıymdar tiziminde sandyqqap, júkqap, qorjyn jáne tekemet bar. Baıpaqtyń qalyby bolmasa da daıyn kıizden piship, tigip beredi. Suranys bir kezderi kúrt tyıylsa, qazir kóbi qysta kóligie jabý izdeıdi. Sebebi kıiz sýyq ótkizbeıdi.
— Bir kezderi bul buıymdarǵa suranys bolmaı qalǵany ras. Eshkim paıdalanbady, ádemi ári arzan zattarǵa áýes boldy. Qazir bárin jańǵyrtyp jatyrmyz. 2010 jyldary Túrkistan qalasyna Aqtóbe oblysy atynan bardym. Sol kezde adamdar kıiz buıymdarǵa qyzyqty. Ózim «Dástúrge jol» birlestiginiń aýyldaǵy tóraǵasymyn, mádenıet úıinde óz kabınetim bar. Bul dúnıeni úırenýge jastar qumar. Alǵashqyda kelinshekter júnniń, shýashtyń ıisi shyǵady dep aıtatyn. Qazir bári ózgerdi, paıdasyn tereń uǵyndy, — dedi Aınagúl Alıeva.
Kıiz basýǵa arnalǵan aq júndi alystan izdemeıdi. Qoradaǵy qazaqy qoıdyń shıkizaty bir ózine jetedi. Eger tapsyrys kóbeıip, azdyq etse, aýyldaǵy sharýalardan alady. Olar býma júndi tegin-aq beredi. Bir ereksheligi, júndi gramdap, kelilep eseptemeıdi. Kóz ólshemmen alady, sabam dep aıyrady. Bir kıizdi basýǵa 10, keıde 15 sabam jún qoldanady.
— Men 8 bala tárbıelep ósirdim. Alty qyzym alty oblysta turady. Barlyq Qazaqstandy sharladym. Bárine de kıizdiń paıdasy týraly aıtyp júremin. Máselen kıizden buıym jasap, qalǵan qıyndysynan ultaraq kesip qoıamyn. Aıaǵyń jyly júredi, syrqyramaıdy. Kıiz boıdaǵy jaǵymsyz energııany ózine tartyp alatyn qasıetke ıe. Júnniń shýashynyń ózi denedegi jaraǵa paıdaly. Daıyn buıymdy arzanǵa baǵalamaımyn. Baǵasyn túsir dep te suramaıdy. Sebebi adamdar shyn eńbekti baǵalap úırenip keledi, — dedi ol.
Aıta keteıik, atyraýlyq jas sheber Nargız Aımaǵambetova kıiz basý ónerin jańǵyrtyp, ony kópshilikke úıretip júrgen jas sheberdiń biri. 24 jastaǵy ol ulttyq murany zamanaýı baǵytpen ushtastyryp, kıizdiń tek turmystyq buıym emes, tereń mádenı ári rýhanı qundylyq ekenin nasıhattap keledi.
