Qyz balany áýejaıda qaldyryp ketý oqıǵasy: Zereniń anasyna 5 mln teńge tólendi

ORAL. KAZINFORM — «Astana-Oral» reısinen 12 jasar Zereni áýejaıda qaldyryp ketý oqıǵasy boıynsha qyzdyń anasyna 5 mln teńge tólendi.

Balanyń qorǵaýshysy Danılhan Shaǵataevtyń Instagram áleýmettik jelisinde málim etkenindeı, sot shyǵyndaryn qosa alǵanda, qyzdyń anasy 5 mln teńgeni tolyq kólemde alǵan.
Air Astana kompanııasy májbúrlep oryndaýǵa jetkizbesten, sot sheshimin oryndady.

Onyń sózine qaraǵanda, ótken jyldan beri sozylǵan iske núkte qoıyldy. 

— Kóp adam sottaspaı-aq 4 mln teńgeni alý kerek dep aıtyp jatty. Zereniń anasy basqa sheshim qabyldady, ol durys bolyp shyqty. Qoǵamdyq pikir týǵyzǵan bul is qoldanystaǵy jolaýshylar tasymaly zańnamasyna, sondaı-aq FlyArystan áýe kompanııasynyń ishki erejesine ózgerister engizýge túrtki boldy, — deıdi D. Shaǵataev.

Onyń aıtýynsha, Air Astana kompanııasy barlyǵy 8 mln 692 myń teńge shyǵynǵa qaldy, buǵan ákimshilik aıyppul men moraldyq zalal kiredi.

Eske sala keteıik, budan buryn qyz balany áýejaıda qaldyryp ketý oqıǵasy boıynsha Air Astana sotta jeńilgenin jazǵan bolatynbyz.