Qyz alyp qashýǵa toqtaý salyndy: Nekege májbúrlep kóndirý qylmys dep tanyldy
ASTANA. KAZINFORM — 16 qyrkúıekten bastap Qazaqstanda nekege májbúrlegeni úshin qylmystyq jaýapkershilik engiziledi, dep habarlaıdy ІІM baspasóz qyzmeti.
16 qyrkúıekten bastap qylmystyq zańnamada azamattardyń quqyqtary men bostandyqtaryn qorǵaýdy kúsheıtýge baǵyttalǵan ózgerister kúshine enedi.
«Keıbir zańnamalyq aktilerge Qazaqstan Respýblıkasynyń qylmystyq zańnamasyn ońtaılandyrý máseleleri boıynsha ózgerister men tolyqtyrýlar engizý týraly» Zańda adam urlaý jáne nekege májbúrleý sııaqty ózekti taqyryptarǵa qatysty ózgerister qarastyrylǵan.
— Basty jańashyldyqtardyń biri — Qylmystyq kodekstiń 125-babyndaǵy eskertpeniń alynyp tastalýy. Buǵan deıin urlanǵan adamdy erikti túrde jibergen adam qylmystyq jaýapkershilikten bosatylýy múmkin edi. Endi bul múmkindik alynyp tastaldy: jábirlenýshini óz erkimen bosatqan kúnniń ózinde kináli adam zańǵa sáıkes jaýapkershilikke tartylady, — dep túsindirdi mınıstrlik.
Sonymen qatar Qylmystyq kodekske jańa 125-1-baby «Nekege májbúrleý» engizildi. Endi bul áreket qylmystyq quqyqbuzýshylyq retinde tanylady.
— Nekege májbúrlegeni úshin aıyppul, túzeý nemese qoǵamdyq jumystar, bas bostandyǵyn shekteý nemese bas bostandyǵynan aıyrý túrindegi jaza qarastyrylǵan. Qylmystyń mán-jaıyna baılanysty 2000 aılyq eseptik kórsetkishke deıingi mólsherde aıyppuldan bastap eki jylǵa deıingi merzimge bas bostandyǵynan aıyrýǵa deıin jaza qarastyrylady. Eger mundaı áreket abaısyzda aýyr zardaptarǵa ákelse, bes jyldan on jylǵa deıin bas bostandyǵynan aıyrý jazasy kózdeledi. Al eger májbúrleý zorlyq-zombylyqpen, kámeletke tolmaǵandarǵa qatysty, táýeldiligin paıdalaný arqyly, adamdar tobymen nemese qyzmet babyn paıdalana otyryp jasalsa, budan da qatań jaza qarastyrylǵan, — delingen vedomstvo taratqan aqparatta.
Bul ózgerister nekege májbúrleýdiń aldyn alýǵa jáne eń aldymen áıelder men jasóspirimder sııaqty osal toptardy qorǵaýǵa baǵyttalǵan.
Osyǵan deıin Qazaqstanda dropperlik úshin qylmystyq jaýapkershilik engizilgenin jazǵan bolatynbyz.