Qyz alyp qashýdy nasıhattaýǵa bolmaıdy: ánshilerge talap qoıylýy múmkin

ASTANA. KAZINFORM — Búgin Senattyń jalpy otyrysynan keıingi baspasóz máslıhatynda qazir shyrqalyp júrgen ánderdiń maǵynasyna qatysty suraq qoıyldy. 

- Zańnama aıasynda nekege májbúrlep kóndirý qylmys dep tanyldy. Osy oraıda qazir quqyq qorǵaý organdary bul baǵyttaǵy jumysty kúsheıtti. Qazir ánshilerdiń oryndaýyndaǵy ánderdiń maǵynasynda «qyz alyp qashýdy» nasıhattaıtyn sózder kezdesip jatady. Sondyqtan Mádenıet mınıstrligi osyndaı ánderdi anyqtap, tıisti nusqaý bere me?, — dep surady tilshiler.

Mádenıet jáne aqparat vıtse-mınıstri Evgenıı Kochetov mınıstrlik bul máselege nazar aýdaratynyn aıtty.

— Qazaqstandyq ártister el aýmaǵynda ǵana emes, álem elderinde de tanymal. Sondyqtan osy taqyrypqa mindetti túrde mán beremiz. Atap aıtqanda, keıingi kezde keıbir óńirlerde qyz alyp qashýdyń saldary qandaı rezonansqa alyp kelgenin bilemiz. Bul turǵyda qoǵamnyń ózi ártisterge durys baǵyt-baǵdar beredi dep oılaımyz, — dedi vıtse-mınıstr.

Aıta keteıik, 2025 jylǵy qyrkúıekten bastap Qazaqstanda nekege májbúrleý qylmystyq quqyq buzý retinde zańmen bekitildi. Qylmystyq kodekske engizilgen 125-1-bap qoǵamda kópten beri talqylanyp kele jatqan qyz alyp qashý máselesine quqyqtyq núkte qoıdy.