Qyz alyp qashý romantıka emes — advokat jańa zańnyń mańyzyn aıtty
ASTANA. KAZINFORM — Qazaqstanda stalkıngke qatysty qylmystyq jaýapkershilikti jetildirip, kıberstalkıng, qorqytý jáne psıhologııalyq qysym kórsetý faktileri úshin jaýapkershilikti saralaý qajet. Bul týraly Májiliste ótken dóńgelek ústelde Astana qalasy advokattar alqasynyń múshesi, Respýblıkalyq advokattar alqasy tártiptik komıssııasynyń tóraıymy Ásel Toqaeva aıtty.
Onyń aıtýynsha, 2025 jyly Qylmystyq kodekske engizilgen 115-1-bap «Stalkıng» azamattardy qýdalaýdan qorǵaýǵa degen qoǵamdyq suranysty kórsetedi. Alaıda qazirgi redaktsııasy birshama jeńildetilgen sıpatqa ıe.
— Qoldanystaǵy redaktsııa bir ǵana bólikten turady. Onda árekettiń qoǵamdyq qaýiptilik deńgeıine, qýdalaýdyń uzaqtyǵyna, jasalý tásilderine jáne saldaryna qaraı jaýapkershilik saralanbaǵan. Sonyń saldarynan bir rettik mazasyn alý áreketi men júıeli túrde qýdalaý faktileri úshin birdeı jaza qarastyrylǵan. Qazirgi tańda mundaı áreketter úshin 200 AEK deıin aıyppul nemese 50 táýlikke deıin qamaýǵa alý jazasy kózdelgen, — dedi ol.
Advokattyń aıtýynsha, bapta bopsalaý jáne kúsh kórsetý áreketteri qamtylmaǵan. Mundaı jaǵdaıda quqyq buzýshylyqtar ózge, aýyrlaý qylmystyq baptar boıynsha saralanady. Sonyń nátıjesinde uzaq ýaqytqa sozylǵan psıhologııalyq qysym men qýdalaý faktileri kóbine quqyqtyq baǵasyn almaı qalady.
Sondaı-aq sarapshy qoldanystaǵy norma qazirgi zamanǵy qýdalaý túrlerin tolyq eskermeıtinin atap ótti. Onyń ishinde kıberstalkıng, úshinshi tulǵalar arqyly qysym jasaý jáne tehnıkalyq baqylaý quraldaryn paıdalaný sekildi áreketter bar.
Ásel Toqaeva Qylmystyq kodekstiń 125-1-baby — «Nekege májbúrleý» normasynyń da mańyzdylyǵyna toqtaldy.
Onyń pikirinshe, bul baptyń qabyldanýy qyz alyp qashý tájirıbesine qarsy kúrestegi mańyzdy qadam. Óıtkeni qoǵam damyǵanyna qaramastan, mundaı jaǵdaılar elimizdiń keıbir óńirlerinde áli de kezdesedi.
Sonymen qatar advokat jańa normalardyń tıimdi jumys isteýi úshin qosymsha sharalar qajet ekenin aıtty.
Atap aıtqanda, óńirlerde keń kólemdi aqparattyq-túsindirý jumystaryn júrgizý, uzaq merzimdi sot qorǵaý orderlerin engizý jáne quqyq qorǵaý organdarynyń jábirlenýshiler quqyǵyn qorǵaýdaǵy qaǵıdatty ustanymyn qamtamasyz etý mańyzdy.
— Qyz alyp qashý da, adamnyń sońynan túsip qýdalaý da romantıka nemese dástúr emes, bul — quqyq buzýshylyq. Qabyldanǵan zańdar quqyqtyq memleket qurý jolyndaǵy ilgerileý. Endigi mindet — olardyń tıimdi qoldanylýyn qamtamasyz etý. Sonda ǵana árbir áıel men árbir Qazaqstan azamaty ózin qaýipsiz sezine alady, — dedi Ásel Toqaeva.
Eske sala keteıik, memleket basshysy qyz alyp qashý ultymyzdyń bedeline nuqsan keltiretin jabaıy qylmys ekenin aıtqan edi.
