Qyz alyp qashqandarǵa 5 jylǵa deıin bas bostandyǵynan aıyrý jazasy usynyldy

ASTANA. KAZINFORM – Qazaqstanda qyz alyp qashý áreketi úshin 5 jylǵa deıin bas bostandyǵynan aıyrý usynysy jasaldy. Tıisti túzetý jumys tobynda talqylanyp jatyr. Bul týraly Májilis depýtaty Murat Ábenov aıtty.

- Tıisti túzetýdi usyndym. Qazir ol Qylmystyq kodeksti ońtaılandyrý jónindegi jumys tobynda qaralyp jatyr. Jaýapkershiliktiń ártúrli dárejesin, onyń ishinde qylmystyq jaýapkershilik te bar. Máselen, bas bostandyǵynan aıyrý, aıyppuldar, qoǵamdyq jumystar qarastyryldy.

Munyń bári jaǵdaıǵa baılanysty saralanady. Kámeletke tolmaǵan adamǵa qatysty bir top adamnyń áreketi anyqtalsa, qandaı da bir zııan keltirilse, tıisti jaýapkershilik usynylyp jatyr, - dedi M. Ábenov Parlament Májilisinde tilshiler suraǵyna jaýap bere otyryp.

Onyń aıtýynsha, 3 jyldan 5 jylǵa deıin bas bostandyǵynan aıyrý túrindegi qylmystyq jaýapkershilikti engizý usyndy.

«Bul rette bireýdi óz erkine qarsy alyp qashyp, úıinde ustaý, psıhologııalyq jáne fızıkalyq qysym kórsetse, zań jábirlengen adam jaǵynda bolýy kerek», - dedi depýtat.

Buǵan deıin ІІM qyz alyp qashý qylmystarynyń statıstıkasyn jeke júrgizetinin habarlady.