Qıyrshyq tas shyǵaratyn zaýyt jumysshylary jalaqylaryn ala almaı júr

AQTÓBE. QazAqparat - Aqtóbedegi Birshoǵyr aýylynda qıyrshyq tas óndiretin «Jańatas» seriktestiginiń jumysshylary úsh aıdan beri jalaqy ala almaı júr. Olar júzdegen shaqyrym qashyqtyqta jatqan aýyldan Aqtóbe qalasyna kelip, keńse esigin torýyldatyp júr. Aldy bir aptadan beri aqsha surap, týystarynyń úıin panalasa, keıbiri aýylyna keri qaıta almaı ábigerge tústi, dep habarlaıdy «QazAqparat» tilshisi.

Aqtóbe oblysy, Shalqar aýdanyna qarasty Birshoǵyr aýyly mańynda qıyrshyq tas óndiretin «Jańatas» kompanııasy jumysshylaryna jalaqy tóleı almaı otyr. Kúnde «erteń bolady» degen jaýapty estip, sharshaǵan jumysshylar búgin keńse aldyna jınalyp, ákimdikten kómek surady.

«Jalaqy ala almaǵan soń qazan aıynan bastap prokýratýraǵa, eńbek ınspektsııasyna shaǵym túsirdik. Eshkimnen jaýap kelmedi. Qazir aýyldan, qalaǵa keldik. Bir aptadan beri keńsege kelip júrmiz, jaýap joq. Bala-shaǵamyz kúnde jylaıdy, nesıemiz de tólenbeı jatyr. Tipti, qaıyr surap ketýdiń az-aq aldynda júrmiz», - dedi Maqsat Tájibaev.

Jumysshylardyń bir bóliginde zańdy qujattary bar. Olar kelisimshart negizinde eńbek etip jatyr. Al bir bóligi aýyzeki tilde kelisip, ýaǵdalasqan.

«Qaladaǵy keńsege kelip, jalaqymyzdy alamyz dep úmittendik. Biraq eshkim naqty jaýap bere almaıdy. Aýyldan keldik, qazir qaltamyzda bir tıyn aqsha qalmady. Aýylǵa qalaı qaıtarymyzdy bilmeımiz. Bárimizdiń basymyzda birneshe nesıe bar, balalarymyzǵa tamaq taýyp berý muń bolyp ketti»,- deıdi Edige Naýryzbaev.

Aqtóbe qalasyndaǵy «Jańatas» seriktestiginiń ǵımaraty esikti qulyptap qoıǵan. Jumysshylar búgin taǵy ishke kire almaı, bos ketti. Al mekeme basshylary men zańgeri qandaı da bir aqparat berýden bas tartty.

Altynaı Saǵyndyqova