«Qıyndyqtardyń barlyǵy da ótkinshi» - baspasózge sholý
«Úkimettiń keńeıtilgen otyrysynyń qorytyndysy jáne daǵdarysqa qarsy is-sharalar barysy keshe Ortalyq kommýnıkatsııalar qyzmetinde ótken brıfıngte keńinen sóz boldy. Bul joly buqaralyq aqparat quraldary ókilderiniń aldynda Májilis depýtattary, «Halyqtyq kommýnıster» fraktsııasynyń jetekshisi Vladıslav Kosarev pen osy fraktsııanyń múshesi Tursynbek Ómirzaqov óz oılarymen bólisti», - dep jazady «Egemen Qazaqstan» gazeti búgingi sanyndaǵy «Qıyndyqtardyń barlyǵy da ótkinshi» degen taqyryptaǵy maqalasynda.
Basylymnyń jazýynsha, aldymen sóz alǵan fraktsııa jetekshisi V.Kosarev Májiliste qaralǵan 2015-2017 jyldarǵa arnalǵan bıýdjet jobasyn ońtaılandyrý azamattardyń áleýmettik jaǵdaıyna esh teris áser etpeıtinin basa aıtty. Depýtattyń sózine qaraǵanda, barlyq áleýmettik baǵdarlamalar buǵan deıin qaralǵan deńgeıinde kórinis taýyp otyr. Al T.Ómirzaqov bıýdjet jobasy shyǵys bóliginiń 10 paıyzy (700 mıllıard teńgedeı) ońtaılandyrylǵanyn, bul anaý aıtqandaı onsha kóp qarjy emestigin jetkizdi. Osy rette, Esep komıtetiniń málimetine súıengen depýtat 2014 jyly bıýdjet buzýshylyqtary 760 mıllıard teńgeni quraǵandyǵyn alǵa tartyp, bul somanyń ońtaılandyrýǵa túsken qarjymen bara-bar ekendigine nazar aýdartty.
Elimizde sybaılas jemqorlyqqa qarsy kúreske qashanda basa mańyz berilip keledi. Bul turǵyda, ásirese, memlekettik qyzmet sapasyna aıryqsha nazar aýdarylýda. Sebebi, elge qyzmet etetin memlekettik qyzmetshilerdiń qyzmet kórsetý sapasy men jumysynda min bol¬maýy qajet. Osy oraıda olardyń jumysyn ońtaılandyrý maqsatymen Prezıdent Jarlyǵymen Memlekettik qyzmet isteri jáne sybaılas jemqorlyqqa qarsy is-qımyl agenttigi quryldy. Osy oraıda «Egemen Qazaqstan» gazeti memlekettik basqarý júıesindegi reformalarǵa sáıkes qurylǵan jańa Memlekettik qyzmet isteri jáne sybaılas jemqorlyqqa qarsy is-qımyl agenttiginiń máni men baǵytyna jáne bastap jatqan jańa jumystary týraly keńirek bilý úshin agenttik tóraǵasynyń orynbasary Saıan Ahmetjanovty suhbatqa tartqan. Basylym tilshisiniń barlyq saýalyna tuşymdy jaýap bergen ol: «Keleshekte memlekettik qyzmetti jańǵyrtýdyń uzaq merzimdi sharalarynyń bir bóligi retinde aıryqsha talantty basqarý júıesin qurý, korporatıvtik sektordyń jáne halyqaralyq konsaltıngtik agenttikterdiń tájirıbesi boıynsha basqarýshylyq býynnyń quzyretterin baǵalaý, qoǵam qajettiligin anyqtaý úshin turaqty keri baılanys ornatýdy aıtýǵa bolady. Bul baǵyttaǵy jumystardy biz joǵary josparlaý, talanttardy basqarý, personaldy basqarýdy avtomattandyrý júıesin engizýge baǵyttadyq. Osy oraıda, irikteý ádisteri men kásibı daıarlaýdy jetildirýdi engizý arqyly memlekettik qyzmettiń kadrlyq quramyn kúsheıtýge erekshe kóńil bólinedi», - deıdi. Suhbat «Jańa qurylym jańasha jumys isteıdi» degen taqyryppen berilgen.
***
Memleket basshysy atyna kásiporyndar men uıymdardyń jumysshylarynan, kórnekti sportshylardan saılaý ótkizý týraly sheshimdi qoldaǵan jáne Nursultan Nazarbaevqa óz kandıdatýrasyn Qazaqstan Respýblıkasy Prezıdenti laýazymyna usynýdy ótingen hattar legi jalǵasýda. Solardyń birparasy «Kazahstanskaıa pravda» gazetiniń búgingi sanynda jarııalandy. Atap aıtqanda, Taraz qalasyndaǵy «Qazfosfat» JShS ókilderi álemdik qurylymdaǵy jahandyq ózgerister aıasynda Qazaqstan halqy birtutas bolýy jáne el Prezıdentimen birge júrýi tıis ekenine toqtalǵan. «Qazfosfattyń» alty myń adamdyq eńbek ujymynyń tilegi - Sizge jańa senim mandatyn berý. Biz óz bolashaǵymyzdy naq Sizben baılanystyramyz, bizge Qazaqstannyń burynǵysha beıbitshilik pen kelisimniń ortasy, turaqty ári qarqyndy damýshy memleket bolyp qala berýi úshin bárin de jasaı alatyn dál Sizdeı dana Kóshbasshy kerek», - delingen ujym jedelhatynda. Al Pavlodar qalasyndaǵy «Qazaqstan elektrolız zaýyty» AQ basshysy A.Ibragımov kásiporyn ujymy barlyq jetistikteri men tabystaryn Memleket basshysynyń esimimen baılanystyratynyn atap ótken. «Saılaýǵa kandıdatýrańyzdy usynýdy eki jarym myńnan astam metallýrgterdiń atynan ótinemin. Qazaqstan Sizdiń basshylyǵyńyzben kóp nársege qol jetkize aldy. Bizdi bolashaqta da jańa bıikter, órkendeý jáne ekonomıkalyq damý kútip turǵanyna senimdimin. Bul jolda bizge Siz sııaqty qýatty Kóshbasshy kerek», - delingen hatta.
***
Pavlodarda qaskúnemder sý perisi músinin kezekte márte talqanyn shyǵardy. Músin qaskúnemderdiń qolynan birinshi márte zardap shegip otyrǵan joq. Alaıda, polıtsııa qyzmetkerleriniń qolynan túk keler emes. Óıtkeni, músinge kúndiz-túni baqylaý qoıýǵa esh múmkindik joq», - dep jazady «Ekspress-K» gazeti búgingi nómirindegi «Vandal ı rýsalka» degen taqyryptaǵy aqparatynda. Ertistiń jaǵalaýyna ornatylǵan sý perisiniń músinin qaskúnemder jerge qulatyp, bet-aýysyn boıap tastaǵan. Buǵan deıin músinniń saýsaqtaryn, quıryǵyn syndyryp ketken bolatyn. Ol kezde jeke tulǵalar músindi qaıta qalpyna keltirý shyǵyndaryn óz moıyndaryna alǵan edi. Qazirgi ýaqytta músin qalalyq kommýnaldyq sharýashylyq mekemesiniń qoımasynda jatyr.
