«Qıyndyqqa moıymaǵan qazaq» - BAQ-qa sholý
***
«Egemen Qazaqstan» basylymynyń jazýynsha, Qazaqstan Respýblıkasynyń Ulttyq Banki 2013 jylǵy 28 mamyrdan bastap neızılber qospasynan jasalǵan nomınaldyq quny 50 teńgelik M.Jumabaevtyń 120 jyldyǵyna arnalǵan eskertkish monetany aınalysqa shyǵaratyndyǵyn habarlady. Monetanyń qyry bederli jáne qaptalyndaǵy beıneler men jazýlar shyǵyńqy. Dıametri - 31 mm., massasy - 11,17 gramm, taralymy - 100 000 dana.
Nomınaly 50 teńgelik eskertkish monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq shottarǵa, salymdarǵa, akkredıtıvterge esepteý úshin jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady.
«Apat aıtyp kelmeıdi». Bári aıaq astynan, kútpegen jerden bolyp jatady. Sondaı oqıǵanyń biri keshe tústen keıin Qyzylorda oblysynda oryn aldy. Aqtóbe-Almaty baǵytynda kele jatqan júk poıyzynyń 5 vagony relsten shyǵyp ketti. Solaısha, 44 vagondyq kólik jol jıegine qısaıyp qaldy»,-dep jazady «Egemen Qazaqstan» gazeti «Poıyz relsten shyǵyp ketti» atty materıalda. Oqıǵa oryn alǵan jerge Qarmaqshy aýdany ákimdiginiń adamdary, tótenshe jaǵdaılar departamentiniń qyzmetkerleri shuǵyl túrde jetken. Tıisti kómek der kezinde berilgen. As-sýlary jetkizilip, qajetti jaǵdaıda jedel-járdem qyzmetkerleri kómek kórsetken. Eń bastysy, adam shyǵyny joq. Biraq osy baǵytta qatynaıtyn poıyzdardyń joly jabylyp, adamdar ábigerge túsip qaldy. Olarǵa túsindirý jumystary júrgizilýde.
***
«Aıqyn» basylymynyń jazýynsha, 1930 j. bastalyp, 1950 jylǵa deıin jalǵasqan qýǵyn-súrgin kezeńinde keshegi Keńes Odaǵy boıynsha 5 mıllıonǵa jýyq adam jazyqsyzdan-jazyqsyz japa shegip, sonyń ishinde 1 mıllıon er-azamat «halyq jaýy» degen kúdikpen atylǵan. Al dál sol jyldary Qazaqstanda 22933 adamǵa qatysty 9805 is qozǵalyp, 3386 azamat atý jazasyna kesilgen. Naqty derek boıynsha mysaly, 1937 jyly Qaraǵandy oblysynda orta eseppen bir kúnde 3 adam, al Almaty oblysynda kún saıyn 37 - 39 qoǵam qaıratkeri atylyp otyrǵan kórinedi. Sondaı-aq 13151 adam «ıtjekkenge» aıdalypty. Mundaı soıqan Stalın ómirden ótkenge deıin, ıaǵnı 1953 jylǵa deıin júrgizildi. Bul jaıynda tolyq bilgińiz kelse, «Qıyndyqqa moıymaǵan qazaq» atty maqalany oqyńyz.
***
«Nur Astana» gazetinde «Qos ýnıversıtet qara úzip shyqty» degen materıal basylǵan. Halyqaralyq QS Ltd reıtıngtik kompanııasynyń zertteý qorytyndysy boıynsha elimizdegi qos birdeı JOO - L.N. Gýmılev atyndaǵy EUÝ men ál-Farabı atyndaǵy QazUÝ álemniń eń úzdik 400 ýnıversıtetiniń qataryna endi. Taıaýda Bilim jáne ǵylym mınıstri Baqytjan Jumaǵulov atylmysh kompanııanyń basshysy Nýndzıo Kýakýarellıdi qabyldap, qazaqstandyq bilim júıesiniń jetistikteri men baǵyttaryn talqylady.
