Qıyndyqqa dýshar bolǵan jandarǵa 198 myń teńge kóleminde járdemaqy beriledi - Qaraǵandy
QARAǴANDY. QazAqparat - Qaraǵandyda áleýmettik organdar 2015 jyldan bastap, qıyndyqqa dýshar bolǵan azamattarǵa aqshalaı kómek kórsetpek. Bul týraly qala ákiminiń orynbasary Irına Lıýbarskaıa habarlady.
Qaǵıdada járdemaqyny órt nemese tabıǵı apaty, sondaı-aq týberkýlez, JITS aýrýlardy juqtyrǵan azamattar ala alatyny aıtylǵan.
«Túrli apat nemese tilsiz jaý saldarynan azamatqa (otbasyǵa) nemese onyń múlkine zııan keltirilgen jaǵdaıda áleýmettik kómek oqıǵa oryn alǵan sátten bastap bir jyl ishinde beriledi. Kómek birjolǵy. Onyń shekti mólsheri 100 aılyq eseptik kórsetkish (1 AEK=1982 teńge)», - dep túsindirdi Qaraǵandy ákiminiń orynbasary.
Ol ár jeke jaǵdaıda kómek kórsetý qajettiligi men onyń mólsherine qorytyndyny arnaıy komıssııa shyǵaratynyn atap ótti. Bul rette otbasynyń jan basyna shaqqandaǵy tabysy men apat dárejesi eskeriledi.
Qıyndyqqa dýshar bolǵan azamattarǵa kómek kórsetýge Qaraǵandy bıýdjetinen barlyǵy 12,6 mln. teńge qarastyryldy.
