Qıyn jaǵdaıǵa dýshar bolǵan palestındik musylmandar qaıyrymdylyq esebinen aýyz ashýda
ASTANA. 29 shilde. QazAqparat - Bıylǵy Ramazan aıynda oraza tutatyn palestındik musylmandar qıyn jaǵdaıǵa dýshar bolyp otyr. Onyń sebebi, elde oryn alǵan ashtyq aýzy berik musylmandardy qoıyp, tipti ózge din ókilderin de azyq-túliksiz qaldyrýda. Bul jaıynda Qazaqstan musylmandary dinı basqarmasynyń resmı saıty muftyat.kz jazady.
Palestındik turǵyn Ýmm Muhammed aýyzasharǵa jeıtin taǵamy da keıde bolmaı qalady. Ol jeke qaıyrymdylyq kómekterdiń arqasynda ǵana ómir súrip otyr. Tiske basar azyq tappaı, qıynshylyqta ómir súrip jatqan Hevron qalasynyń turǵyny Ýmm Muhammed esimdi palestındik zeınetker áıel eldegi qıyn jaǵdaıdy Reuters agenttigine bergen suhbatynda bylaısha baıandaıdy: «Búginde bizdiń jaǵdaıymyz óte múshkil. Jeıtin tamaqqa muqtaj bolyp otyrmyz. Turǵyn úıimizdiń de jaǵdaıy máz emes».
Aýyzashar ýaqyty kelgende hevrondyq zeınetker áıel de Takııat Ibrahım mekemesine baryp sol jerden aýzyn ashady eken. Azyq-túlikpen qamtamasyz etetin mekeme jeke kómek kórsetilýdiń arqasynda ǵana jumys istep, halyqty tamaqtandyrady. Myńdaǵan palestındikter osyndaı kómektiń arqasynda ǵana ómir súrýde. Mekemede azyq-túlikti bárine jetkizý úshin taǵamdar kúnde úlken mólsherde daıyndalady. Bul jerde taýyq pen burshaqtan daıyndalǵan taǵamdar arnaıy ydystarǵa salynyp beriledi.
«Tamaqtanýǵa únemi 2500-3000-ǵa jýyq otbasylar kelip otyrady», - dep habarlady baspananyń basshysy Ammar ál-Hatyb. Ierýsalımdik ýaqf bóliminiń meńgerýshisi sheıh Azzam ál-Hatybtyń aıtýynsha, azyq-túlikpen qamtamasyz etetin mekemeler kóp jyldar boıy jaǵdaıy múshkil adamdardy tamaqtarmen qamtamasyz etip júr.
