Qıyn-qystaý kúnderde qazaq halqynyń keńdigi demeý boldy – Ge Hak Rım
Sonyń bir úlken bóligi Syr boıyna qonystandyryldy. Men ol kezde bar joǵy 11-12 jastaǵy bala edim. Osy ýaqyttan bastap Syr óńirindegi koreı halqynyń tarıhy bastaldy. «Qazaqstan koreıler qaýymdastyǵy Qyzylorda oblystyq fılıaly» aqsaqaldar keńesiniń tóraǵasy Ge Hak Rım osylaı dep eske alady, dep habarlaıdy QazAqparat tilshisi.
«Ol kezdegi saıası-áleýmettik jaǵdaıdyń qazaq halqy úshin de ońaı soqpaı turǵanyn kózimmen kórdim. Halyqty qulazytyp ketken asharshylyq, halyq jaýy degen jalǵan aıyptar taǵylyp, saıası repressııalardyń júrgizilýi sonyń kýási edi. Bizder de qazaq halqynyń qurmetine saı bolý úshin elge, jerge degen yqylasymyzdy bildirý maqsatymen bilek sybana eńbekke aralastyq. Ásirese, kúrish ósirý sharýashylyǵynda aıtarlyqtaı jetistikterge qol jetkizildi. Osy eńbekterimizdi elegen basshylyq oblys boıynsha koreı ultynyń 28 azamatyna Eńbek Eri ataǵyn berdi. Bul jergilikti halyqtyń keń peıilinen dep bilemiz» -dedi aqsaqaldar keńesiniń tóraǵasy.
Onyń sózinshe, Syr boıynda qonystanǵan koreı halqyna aǵa urpaq ókilderi, atap aıtqanda koreı halqynyń ult batyry Hom Bom Do, aǵartýshy-ǵalym Ge Bon Ý jáne taǵy basqalar qazaq halqymen baýyrlastyqtyń úlgisin kórsetti.
«Olardyń Alashtyń anasyna baǵalanǵan qasıetti mekeninde máńgilik pana tabýy da sonyń aıǵaǵy. Qazirgi tańda bizge eń qymbaty - aýyzbirshilik, eldegi tatýlyq. Búginde Qazaq halqynyń yqylasy men darhan kóńiliniń arqasynda kósegemiz kógerip, ósip-ónip jatyrmyz. Basymyzǵa kún týyp, zulmat kúndi bastap keshkende baýyryna basqan eldiń biz úshin jaqsylyǵy ushan-teńiz», deıdi aqsaqal Ge Hak Rım.
