Qııar, pııaz, jylqy eti – Áleýmettik mańyzǵa ıe azyq-túliktiń qatary keńeıtiledi

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Úkimet otyrysynan keıin ótip jatqan baspasóz máslıhatynda jylqy eti áleýmettik mańyzy bar taýarlardyń qataryna enýi múmkin ekenin aıtty.

— Áleýmettiń mańyzy bar azyq-túliktiń 19 túri bar. Jalpy halyq jıi paıdalanatyn azyq-túliktiń 29 túri bar. Al búkil tizim — 160. Ony qalaı retteımiz? Retteýdiń eshqandaı túri joq. Baǵasy kúrt ósetin qııar, pııaz, qaraqumyq sııaqty ónimder bar. Olar 19 taýardyń ishinde joq. Sondyqtan men tapsyrma berdim. Qazir durystap taldaý jasap, erteń kerek bolsa, osy tizimge 4-5 jańa túrdi engizý máselesin pysyqtaımyz. Sebebi olardy tizimge engizsek, baǵasyn qatań baqylaýǵa múmkindik bolady. Árıne, ony jan-jaqtan qaraý kerek. Baǵany turaqtandyramyz dep júrip óndirýshilerge zııan tıgizip almaý mańyzdy, — dedi Serik Jumanǵarın.

Sondaı-aq, ol áleýmettik mańyzy bar azyq-túlik tizimine ettiń keıbir túrleri de kirýi múmkin ekenin aıtty.

— Qııar men pııazdan basqa ettiń basqa túrlerin qarap jatyrmyz. Jaýyryn bóligi deımiz ǵoı, sol sııaqty basqa túrlerin qarap jatyrmyz. Jylqy eti de bar. 5-6 túrdi durystap qaraýdy tapsyrdym. Usynys engizedi, — dedi vıtse-premer.

Osyǵan deıin Serik Jumanǵarın azyq-túlik baǵasynyń ósimine qatysty pikir bildirdi.