Qııar men qyzanaq baǵasy shamamen 40% qymbattady

ASTANA. KAZINFORM - 2024 jylǵy qarashada tutyný baǵalarynyń aılyq ındeksi aldyńǵy aıdaǵydaı 0,9% qurady. Bul týraly Ulttyq statıstıka bıýrosy habarlady.

Azyq-túlik taýarlarynyń baǵasy – 1,1%, aqyly qyzmetter – 0,8%, azyq-túlik emes taýarlar 0,7% joǵarylady.

Azyq-túlikten qııar baǵasy – 40,3%, qyzanaq – 37,3%, tátti burysh – 15,5%, basty pııaz – 13,9%, sarymsaq – 10,1%, qyryqqabat – 8,9%, kartop – 6,2%, apelsın – 4,8%, lımon – 4,1%, kúnbaǵys maıy 4% ósti. Baǵanyń tómendeýi kúrishke – 2%, qantqa – 1,9%, almaǵa 0,7% baıqaldy.

Turǵyn úı-kommýnaldyq qyzmetter salasynda tarıfter sýyq sýǵa – 11,4%, elektr energııasyna – 3,4%, qoqys shyǵarýǵa – 2,2%, ortalyqtan jylytýǵa 2,1% joǵarylady. Shınamontaj qyzmetteri 3%, monsha qyzmetteri – 2,6%, shashtaraz ben sulýlyq salondarynyń qyzmetteri 1,2% qymbattady.

Sonymen qatar, aǵymdaǵy jyldyń qarasha aıynda baǵanyń ósýi otynǵa – 1,4%, tas kómirge 1% baıqaldy. Smartfon – 9,8%, altynnan jasalǵan neke júzigi – 6,2%, kıim jáne aıaqkıim 0,9% qymbattady.

Óńirlerdiń ishinde eń joǵary aılyq ınflıatsııa Qaraǵandy oblysynda – 1,5% (ortasha respýblıkalyq deńgeıden 0,6 p.t. joǵary), eń tómengi – Almaty qalasynda 0,4% tirkeldi.

Óńirler bólinisinde eń joǵary azyq-túlik taýarlarynyń baǵalary Shymkent qalasynda – 2%, azyq-túlik emes taýarlaryna – Mańǵystaý oblysynda 2,3%, aqyly qyzmetterge – Almaty oblysynda 2,6% ósti.

Eske salsaq, buǵan deıin Qazaqstanda qaraqumyq pen kúrish baǵasy qansha ekeni týraly jazǵan bolatynbyz.