Kiva, DosbolLIKE: Mekteptegi býllıngke qarsy eki baǵdarlama engizildi
ASTANA. KAZINFORM – Elimizdiń mektepterinde býllıngke qarsy eki baǵdarlama engizildi. Onyń biri tájirıbeden ótken sheteldik baǵdarlama bolsa, ekinshisin otandyq ǵalymdar ázirlegen. Bul týraly QR Oqý-aǵartý vıtse-mınıstri Edil Ospan aıtty.
— Býllıng bolǵan jaǵdaıda jaýapqa bala emes, ata-ana tartylady. Qazirgi tańda barlyq mektepterge antıbýllıng baǵdarlamalaryn engizý jumystary júrgizilip jatyr. Eki baǵdarlama engizilip bastaldy. Birinshisi — áıgili Kiva. Ol álemniń birneshe memleketinde jemisin bergen baǵdarlama. Ekinshisi — mınıstrliktiń (QR Oqý-aǵartý mınıstrligi – red.) janyndaǵy «Órken» balalardyń salamattyǵyn arttyrý ulttyq ǵylymı-praktıkalyq ınstıtýtynyń» ǵalymdary otandyq úzdik tájirıbelerdi zerdeleı kele jasap shyqqan «DosbolLIKE» baǵdarlamasy. Ony osy oqý jylynyń basynan bastap engizdik. Olardyń nátıjesi týraly aıtý úshin biraz ýaqyt ótýi kerek bolady. Alǵashqy qorytyndylaryn oqý jylynyń aıaǵynda alamyz dep oılaımyz, — dedi ol.
Onyń aıtýynsha, bul baǵdarlamalar eń problemalyq mektepterge engizilgen.
Sondaı-aq, vıtse-mınıstr bala tárbıeleý isinde muǵalim men ata-ananyń birlese jumys isteýine múmkindik beretin joba qolǵa alynǵanyn aıtty.
— 2023-2024 oqý jylynda alǵash ret barlyq bilim berý uıymdarynda jalpy adamzattyq jáne ulttyq qundylyqtarǵa negizdelgen memleketimizdiń saıasatyn kórsetetin «Birtutas tárbıe» baǵdarlamasy engizildi. Árbir balanyń qalyptasýyna tikeleı yqpal etetin negizgi tulǵa ata-ana ekeni belgili. Bul rette qazirgi ata-ana tarapynan bala tárbıesinde pedogogıkalyq kómekke suranystyń bar ekenin kórip otyrmyz. Sodyqtan mektepterde alǵash ret ata-analardy pedagogıkalyq qoldaý ortalyqtary ashylyp, tabysty jumys atqaryp jatyr, — dedi Edil Ospan.
Aıta keteıik, Bıyl Psıhologııalyq qoldaý ortalyqtary 240 myńǵa jýyq oqýshy men olardyń ata-analaryna kómek kórsetti.