«KITF-2018» kórmesi týrızm salasyndaǵy tyń jańalyqtardy usynady
ASTANA. QazAqparat - 18 sáýir kúni Almatyda «Týrızm jáne Saıahat» - KITF-2018 jyl saıynǵy kórmesi óz jumysyn bastady. Dástúrli túrde bıznes alań jańa trendterdi belgilep, sońǵy jańalyqtardyń jáne jaz maýsymyndaǵy týrıstik sektordyń jumysyna arnalǵan quraldardyń tusaýyn kesedi, dep habarlaıdy QazAqparat.
KITF-2018 kórmesi halyqaralyq jáne ishki týrızm, medıtsınalyq jáne saýyqtyrý týrızmi, iskerlik týrızm sııaqty salalar men «Shet memlekettegi jyljymaıtyn múlik» sııaqty jańa salany qamtıdy, ol jyljymaıtyn múlik naryǵynyń qatysýshylary úshin jáne týrızm salasynyń ókilderi úshin jańa múmkindikterge jol ashady.
Kórmeniń ashylǵan kúninen, ıaǵnı sáýirdiń 18-nen bastap 20 sáýirge deıin týrızm boıynsha túrli taqyryptyq tanystyrylymdar ótedi. Olardy Farhat International Tours & Travels Bahreın týroperatory, KAZUNION qazaqstandyq týroperator, Premium Travel Company Qazaqstannyń kóp beıindi týroperatory, TEZ TOUR halyqaralyq týroperator, KF Týrıstik Qamqor jáne «Nıka» reseılik krýızdik týroperatory sııaqty ujymdar usynady. Reseı jáne TMD Medıtsınalyq týrızm agenttikteri assotsıatsııasy senimdi seriktesterdi izdeý jáne salanyń atalǵan segmentinde berik irgetasty qalyptastyrý úshin ІT-sheshimder taqyrybynda oqytý semınaryn ótkizedi. Óz kezeginde Qazaqstannyń týrıstik assotsıatsııasy kórmeniń iskerlik baǵdarlamasy sheńberinde «Ekologııalyq Týrızm - ındýstrııa trendi» jáne «Qonaqúıdi qalaı ashýǵa bolady» atty taqyryptarda jumys júrgizedi.
«KITF kórmesiniń uıymdastyrylýyn joǵary baǵalaımyz, kórmeniń qonaqtary men týrıster ózderi úshin qyzyqty usynystar tabatynyna senimdimin» - dedi Almaty qalasynyń týrızm jáne syrtqy baılanystar basqarmasynyń bastyǵy Erlan Jaılaýbaı.
Budan basqa, 20 sáýirde alǵash ret KITF 2018 sheńberinde Almaty Travel Fest saıahatshylar forýmy ótedi. Bul áýesqoı saıahatshylar men kásibı saıahatshylardy biriktiretin jáne belgili trevel-fotograftarmen, trevel-blogerlermen, tilshilermen jáne basqa da týrıstik bıznes ókilderimen tanysýǵa arnalǵan biregeı alań. 
Jalpy alǵanda «Týrızm jáne Saıahat» - KITF 2018 jyl saıynǵy kórmesiniń aýqymy men halyqaralyq formaty shara qatysýshylaryna 29 memleketti qamtýǵa múmkindik beredi. Olar: Ázerbaıjan, Armenııa, Bahreın, Bolgarııa, Vengrııa, Vetnam, Germanııa, Gretsııa, Grýzııa, Domınıkan Respýblıkasy, Egıpet, Úndistan, Indonezııa, Ispanııa, Qazaqstan, Qytaı, Bahreın Patshalyǵy, Kýba, Qyrzǵyzstan, Latvııa, Malaızııa, Maldıv araldary, Marokko, BAÁ, Reseı, Slovenııa, Taıland, Túrkııa, Ózbekstan, Ońtústik Koreıa, Japonııa.
Jyl saıyn ótetin «Týrızm jáne Saıahat» KITF 2018 halyqaralyq kórmesiniń uıymdastyrýshysy Iteca qazaqstandyq kórme kompanııasy. Ol QR Mádenıet jáne sport mınıstrliginiń Týrızm ındýstrııasy departamentiniń. Almaty qalasynyń Týrızm jáne syrtqy baılanystar basqarmasynyń, ıÝNVTO dúnıejúzilik týrıstik uıymynyń, Qazaqstan ulttyq kásipkerler palatasynyń jáne Qazaqstandyq týrıstik assotsıatsııanyń qoldaýymen ótkiziledi. Kórme seriktesi Cornelia Hotels Golf and SPA qonaq úıler jelisi bolyp tabylady.
