Qytaımen júk aǵyny artty: Úkimet ótkizý pýnktteriniń jumysyn keńeıtý máselesin talqylady
ASTANA. KAZINFORM — Vıtse-premer – Ulttyq ekonomıka mınıstri Serik Jumanǵarın shekara mańyndaǵy avtojol pýnktteri jumysynyń tıimdiligin arttyrý máselesi jóninde keńes ótkizdi. Bul týraly Úkimettiń baspasóz qyzmeti habarlady.
Qazaqstan – Qytaı baǵytyndaǵy avtokólikterdiń júk aǵyny qarqyndy ósip jatyr. Mysaly, 2022 jyly QHR-men shekaradan 639,6 myń kólik ótse, al 2025 jyly 1,68 mln kólik ótken. Osylaısha, úsh jyl ishinde kórsetkish 2,5 eseden asa ósti. Qazaqstan men Qytaı arasyndaǵy ekijaqty taýar aınalymyn jylyna $100 mlrd-qa jetkizý mindetin eskersek, shekaralyq ınfraqurylymǵa júkteme áli de ósedi.
Qazaqstan Qarjy mınıstrligi ótkizý qabiletin arttyrý sharalary keshenin usynyp otyr. Onyń negizgisi – ótkizý pýnktteriniń jumys ýaqytyn Qytaı tarapymen úılestirý.
Buǵan deıin qoldanystaǵy ekijaqty ýaǵdalastyqqa sáıkes, Qazaqstan – Qytaı shekarasyndaǵy ótkizý pýnktteri qysqartylǵan jumys rejımi boıynsha, saǵat 8:00-den 12:00-ge deıin jáne 13:00-den 17:00-ge deıin jumys isteıtin. Ótkizý qabiletin arttyrý maqsatynda kezeń-kezeńmen jumys rejımi uzartylyp, QHR shekarasyndaǵy barlyq qazaqstandyq avtomobıl ótkizý pýnkti saǵat 07:00-19:00 aralyǵyndaǵy 12 saǵattyq rejımge aýystyryldy. «Nur Joly» eń iri ótkizý pýnktiniń biri pılottyq rejımde táýlik boıy jumys istep jatyr.
Bul rette qazaqstandyq pýnktterdiń jumys rejımi 19:00-ge deıin uzarǵanmen, qytaı tarapy jumysty 16:00-de aıaqtaıdy. Ýaqyt aıyrmashylyǵy daıyn ınfraqurylymdy paıdalanýdy shektegen. Aldyn ala baǵalaý boıynsha, eki jaqtan da sáıkes keletin jumys ýaqytyn uzartý ótkizý qabiletin keminde 20%-ǵa arttyrýǵa múmkindik beredi.
Osyǵan qosa, ótkizý pýnktteriniń aýmaǵynan tys ilespe operatsııalardy shyǵarý modeli júzege asyrylady. Júk rásimdeý, brokerlik jáne ózge de rásimder, ádette, memlekettik shekaradan 1-10 shaqyrym radıýsta ornalasqan saýda-logıstıkalyq ortalyqtar men ýaqytsha saqtaý qoımalaryna kóshiriledi. Bul ótkizý pýnktterinde tek baqylaý fýnktsııasyn ǵana oryndap, avtokólik quralynyń shekaralyq-kedendik baqylaý aımaǵynda bolý ýaqytyn qysqartýǵa múmkindik beredi.
Búgingi tańda bul model Qazaqstan-Qytaı baǵytyndaǵy «Nur Joly», «Alakól», «Baqty», «Qaljat» ótkizý pýnktinde, sondaı-aq Ózbekstanmen shekaradaǵy «B.Qonysbaeva», «Qazyǵurt» jáne «Atameken» pýnktterinde tolyǵymen engizilgen. Kezeń-kezeńmen júzege asyrý EAEO syrtqy shekarasyndaǵy basqa da avtomobıl ótkizý pýnktterinde jalǵasyp jatyr.
Qazirgi ýaqytta QHR shekarasynda «Nur Joly», «Alakól» jáne «Qaljat» ótkizý pýnkti baǵytynda úsh kóliktik-logıstıkalyq ortalyq jumys isteıdi. «Nur Joly» mańynda iri avtokólikke arnalǵan mamandandyrylǵan ýaqytsha saqtaý qoımasy paıdalanýǵa berildi. «B.Qonysbaeva», «Baqty», «Qazyǵurt» jáne «Atameken» pýnkti baǵytynda jańa nysandar (ÝSQ jáne KLO) engizildi.
Sondaı-aq keńes barysynda qashyqtaǵy avtoótkizý pýnktterin turaqty elektr energııasy kózimen, ınternetpen jáne ózge de qajetti ınfraqurylymmen jabdyqtap, ótkizý qabiletin odan ári arttyrý máselesi qaraldy. Baqty – Aıagóz temir jolynyń qurylysyna qatysty Abaı oblysyndaǵy jumysty úılestirý de talqylandy.
Keńes sońynda qytaılyq tarappen ótkizý pýnktteriniń jumys ýaqytyn uzartý men úndestirý máselesi boıynsha kelissózdi jalǵastyryp, shekara mańyndaǵy jol baǵyttaryn ınfraqurylymdyq jańǵyrtýdy jedeldetý týraly sheshim qabyldandy.
Aıta keteıik, 2025 jyly Qytaı men Qazaqstan arasyndaǵy kólik-logıstıka salasyndaǵy negizgi yntymaqtastyq jobalary qarqyndy iske asyrylyp, mýltımodaldy tasymaldarǵa arnalǵan jańa Eýrazııalyq qurlyq-teńiz dálizin qalyptastyrýǵa tyń serpin berdi.