Qytaımen vızasyz rejım: Almatyǵa aspan asty elinen kelgen týrısterdiń sany 2 ese ósken
ALMATY. KAZINFORM – 2023 jyldyń 10 qarashasynan bastap Qazaqstan men Qytaı arasyndaǵy vızasyz rejım týraly kelisim kúshine engen bolatyn. Bul ózgeris Almatynyń týrıstik sektoryna qanshalyqty áser etkenin Almaty týrızm bıýrosynyń marketıng jáne taldaý bóliminiń basshysy Rýslan Janabaev aıtyp berdi.
Onyń aıtýynsha, ótken jyly Almatyǵa kelgen sheteldik týrısterdiń 12%-y QHR azamattary. Bul megapolıske ózge memleketten kelgen týrısterdiń ishinde ekinshi kórsetkish. 2022 jylmen salystyrǵanda aspan asty elinen kelgen týrısterdiń sany 2 ese ósken.
— Bul (red. vızasyz rejım) — negizgi faktorlardyń biri. Qytaı men Úndistan memleketteri úshin 14 kúndik vızasyz rejımniń engizilýi oń áserin berdi. Óıtkeni Qytaı azamattary úshin memleketimiz jaqyn, qatty alysqa ushýdyń qajeti joq jáne vızasyz rejım biz olar úshin ashyq ekenimizdi kórsetedi. Sondaı-aq bıyl Qytaıda Qazaqstandaǵy týrızm jyly jarııalandy jáne ShYU aıasynda Almaty basty týrıstik qala retinde ataldy. Qazirgi ýaqytta bizge QHR-dyń barlyq óńirlerinen adamdar kelip, kórme, is-sharalar uıymdastyryp jatyr, - dedi Rýslan Janabaev.
Sondaı-aq ol pandemııaǵa deıingi kezeńde elimizge kelgen adamdar negizinen TMD elderinen bolsa, qazir alys shetelden keletin týrısterdiń úlesi 57%-ǵa jetkenin atap ótti.
Almaty týrızm bıýrosynyń málimetine sáıkes, 2023 jyly qalaǵa kelgen týrısterdiń ishinde Reseı azamattary birinshi orynda — 32,6%, ekinshi qytaılyq saıahattaýshylar — 12,2%, úshinshi Úndistan — 8,6%, tórtinshi Túrkııa — 6% jáne besinshi AQSh azamattary — 3,8%.
— Bizdi amerıkalyq týrısterdiń qalamyzǵa keletin saıahatshylar tiziminde alǵashqy bestikke kirgeni qatty tańqaldyrdy. Sebebi Almaty men AQSh-tyń arasy alys. 20 saǵattaı joldy ushyp kelý — olardyń qalamyzdy sanaly túrde tańdaǵanyn kórsetedi. Jalpy qazir alys shetelden týrısterdi tartý jumysy qarqyndy júrip jatyr. Sebebi olar kóbirek aqsha jumsaıdy. Al jumsalǵan ár dollar qalamyzǵa tabys ákeledi. Sondaı-aq jaqynda Kýala-Lýmpýr — Almaty reısiniń ashylýy — biz úshin búkil Azııany ashty. Olar bizdi tranzıttik hab retinde kórip otyr. Azııada adam kóp jáne olar Eýropaǵa, arab elderine baratyn kezde endi Almaty arqyly ushatyn bolady, - dedi Almaty týrızm bıýrosynyń bólim basshysy.
Rýslan Janabaev megapolıske keletin týrısterdiń negizgi bóligi — jalǵyz ne jup bolyp kelgen adamdar ekenin aıtty. Almaty týrızm bıýrosy júrgizgen saýalnama, týrısterdiń 38%-y jalǵyz, 29%-y dostarymen keletinin kórsetken. Sonymen qatar saýalnama nátıjesinde Almatyǵa kelgen týrıster ortasha eseppen bir kúnde 334 dollar jumsaıtyny jáne shaharda 5 kún turaqtaıtyny anyqtalǵan.
Eske salaıyq, buǵan deıin Almatyda biryńǵaı týrıstik bılet iske qosylǵany týraly habarladyq.
