Qytaımen shekaradaǵy avtomobıl ótkizý pýnktteri 1 aqpanǵa deıin jumys istemeıdi

ASTANA. KAZINFORM — Qytaımen shekaradaǵy avtomobıl ótkizý pýnktteri 2025 jyldyń 27 qańtarynan 1 aqpanyna deıin jumys istemeıdi, dep habarlaıdy QM Memlekettik kirister komıteti.

Memlekettik kirister komıteti, QHR-da Kóktem Merekesine baılanysty 2025 jylǵy 27 qańtardyń saǵat 20:00–den, 2025 jylǵy 1 aqpannyń saǵat 08:00–ge deıin, qazaqstan-qytaı shekarasyndaǵy avtomobıl ótkizý pýnkterinde tulǵalardyń, kólik quraldary men júkterdi ótkizý júzege asyrylmaıtyndyǵyn habarlaıdy.

— Qazaqstan-qytaı shekarasyndaǵy temirjol ótkizý pýnktteri shtattyq rejımde jumysyn jalǵastyrady. Tasymaldaýshylardan jáne barlyq shekarany kesip ótýge nıet bildirýshilerdi engizilgen shekteýlerdi eskere otyryp, óz baǵyttaryn aldyn ala josparlaýdy suraımyz, — delingen habarlamada.

Buǵan deıin kartop eksportyna qoıylǵan shekteýge baılanysty Túrkistandaǵy shekara beketterinde baqylaý kúsheıtilgeni belgili boldy.

Sondaı-aq, Prezıdentke memlekettik shekarany qorǵaýǵa jáne kúzetýge qatysty aqparat berilgenin jazdyq.

Qytaı turǵyndary 29 qańtarǵa qaraǵan túni jańa jyldy, ıaǵnı «Chýntsze» (kóktem merekesin) qarsy alady. Osyǵan oraı Qytaı jylan jylyn qarsy alýǵa daıyndalyp jatqanyn jazǵan edik.