Qytaımen shekarada jańa aınalma jol salynady — Úkimet basshysy
ASTANA. KAZINFORM — QR Premer-mınıstri Oljas Bektenov belgııalyq Sarens kompanııalar toby dırektorlar keńesiniń tóraǵasy Lıýdo Sarenspen kezdesý ótkizdi, dep habarlaıdy Úkimettiń baspasóz qyzmeti.
Onda «Nur joly» ótkizý beketiniń aınalma jolyn salý josparlary talqylandy. Yntymaqtastyqty, onyń ishinde mashına jasaý salasynda keńeıtý perspektıvalary qaraldy.
— Joba shekara mańy ınfraqurylymynyń ótkizý qabiletin arttyrýǵa jáne qoldanystaǵy kólik aǵyndaryna júktemeni azaıtýǵa baǵyttalǵan. Salmaǵy 100 tonnadan asatyn iri gabarıtti júkterdi ótkizýge arnalǵan uzyndyǵy 3,2 shaqyrym jáne eni 12 metr aınalma jol salý, sondaı-aq aýdany 81,6 ga kólikterge arnalǵan turaqtar salý josparlanyp otyr. Qosymsha avtojol kópirin salý, tıisti ınfraqurylymdy ornatý qarastyrylǵan. Barlyq nysan kompanııanyń jeke ınvestıtsııalary esebinen salynady, onyń jalpy quny shamamen $50 mln-dy quraıdy, — delingen habarlamada.
Oljas Bektenov jobanyń Memleket basshysy júktegen mindetterge sáıkes, elimizdiń kólik logıstıkasyn, saýda jáne tranzıttik áleýetin damytýdaǵy mańyzdylyǵyn basa aıtty. Sarens kompanııasynyń tájirıbesi men quzyretterin eskere otyryp, lokalızatsııalaý deńgeıi joǵary mashına jasaý salasynda odan ári yntymaqtastyq múmkindikteri atap ótildi.
Kezdesý sońynda taraptar aınalma jol salý jobasyn júzege asyrýǵa ózara múddeliligin jetkizip, yntymaqtastyqty keńeıtýge daıyn ekenderin bildirdi.
Premer-mınıstr jaýapty memlekettik organdarǵa jobany ýaqtyly júzege asyrý úshin qajetti kómek kórsetýdi tapsyrdy.
Budan buryn Úkimet elimizdiń 2029 jylǵa deıingi ulttyq damý josparynyń maqsatyna qol jetkizý jónindegi 2025–2026 jyldarǵa arnalǵan is-qımyl baǵdarlamasyn bekitkeni belgili boldy.