Qytaımen shekarada «Dostyq-avtomobıl» jańa ótkizý pýnkti jumys isteı bastady
ASTANA. KAZINFORM — Memlekettik kirister komıteti Eýrazııalyq ekonomıkalyq odaqtyń kedendik shekarasynyń qazaqstandyq ýchaskesinde keden «Alakól» beketi qurylysynyń aıaqtalǵany týraly habarlaıdy.
Komıtet málimetine sáıkes ótkizý pýnkti tolyq kólemde 2025 jylǵy 12 mamyrdan bastap jumys istep jatyr.
Jańa nysan «Eýrazııalyq ekonomıkalyq odaqtyń kedendik shekarasynyń qazaqstandyq ýchaskesinde ornalasqan ótkizý pýnktterin jańǵyrtý jáne tehnıkalyq jete jaraqtandyrý» jobasy sheńberinde salyndy. Bul jobany iske asyrý syrtqy ekonomıkalyq qyzmettiń tıimdiligin arttyrýǵa, shekaradan ótý ýaqytyn qysqartýǵa jáne syrtqy ekonomıkalyq qyzmetke qatysýshylar men azamattar úshin jaǵdaılardy jaqsartýǵa baǵyttalǵan.
— Qazirgi zamanǵy «Dostyq-avtomobıl» ótkizý pýnkti avtomattandyrylǵan kedendik jáne memlekettik baqylaýdyń ózge de túrlerine arnalǵan barlyq qajetti tehnologııalyq jabdyqtarmen jabdyqtalǵan. Jańǵyrtýdyń negizgi nátıjeleriniń biri jolaqtardyń sanyn ekiden altyǵa deıin arttyrý boldy. Bul ótkizý qabilettiligin táýligine 800 avtomobılge deıin arttyrýǵa múmkindik berdi. Osylaısha, shekaradan ótý ýaqyty edáýir qysqarady jáne halyqaralyq tasymaldardyń logıstıkasy jeńildetiledi, — delingen taratylǵan aqparatta.
Jańa keden beketiniń ashylýy shekara mańyndaǵy ınfraqurylymdy nyǵaıtý, el jáne EAEO-nyń tranzıttik áleýetiniń ótkizý qabiletin arttyrý baǵytyndaǵy mańyzdy qadam boldy.
Buǵan deıin Aqtóbedegi Jaısań shekara beketinde kezek kóbeıgeni belgili boldy.