Qytaımen saýda aınalymy 1,5 ese ósti: BQO jańa múmkindikterge jol ashty
ORAL. KAZINFORM — Batys Qazaqstan oblysynyń ákimi Narıman Tóreǵalıev Lıaonın provıntsııasy partııa komıtetiniń hatshysy Sıýı Kýnlınmen kezdesti. Qos tarap eki el kóshbasshylarynyń basshylyǵymen Qazaqstan men Qytaı arasyndaǵy strategııalyq seriktestik pen jan-jaqty yntymaqtastyqtyń joǵary deńgeıin atap ótti.
Búginde óńiraralyq baılanystar, sonyń ishinde saýda-ekonomıkalyq jáne mádenı-gýmanıtarlyq qarym-qatynas jańa deńgeıge kóterilip keledi.
Sıýı Kýnlın shaqyrýdy qabyl alǵany úshin aımaq basshysyna rızashylyǵyn bildirdi. Ol byltyr Tszıansý provıntsııasynda bastalǵan ekijaqty tanystyqtyń nátıjeli bolǵanyn tilge tıek etip, bul seriktestik aldaǵy ýaqytta turaqty ári serpindi jalǵasatynyna senim bildirdi.
Oblys ákimi Narıman Tóreǵalıev Memleket basshysy Qasym-Jomart Toqaevtyń tikeleı sheteldik ınvestıtsııa tartý jáne ınvestıtsııalyq tartymdylyqty arttyrý jónindegi tapsyrmalaryna sáıkes aımaqta aýqymdy jumystar atqarylǵanyn atap ótti.
— Búgingi tańda Batys Qazaqstan oblysy men Qytaı Halyq Respýblıkasynyń strategııalyq seriktestigi bekı tústi. 2025 jyldyń qorytyndysy boıynsha bizdiń óńir men Qytaı arasyndaǵy syrtqy saýda aınalymynyń kólemi 175 mln AQSh dollaryn qurady, bul 2024 jylǵy kórsetkishten 1,5 ese kóp. Tszıansý provıntsııasynda Halyq Úkimetiniń tóraǵasy bolǵanyńyzda sizben kezdesip, birqatar baǵyt boıynsha kelisimderge kelgen edik. Sonyń aıasynda naqty jobalar iske asyrylyp jatyr. Taıaý arada Lıaonın provıntsııasymen de turaqty baılanys bekıdi degen senim mol, — dedi Narıman Tóreǵalıev.
Aımaq basshysy Batys Qazaqstan oblysynyń logıstıkalyq áleýeti men ınvestorlar úshin jasalǵan qolaıly jaǵdaılardy atap ótip, birlesken jobalardy júzege asyrýǵa daıyn ekenin jetkizdi.
