Qytaılyqtar az úılenip, kóp ajyrasa bastaǵan
ASTANA. KAZINFORM — Qytaıda neke sany rekordtyq deńgeıde tómendep keledi, dep habarlaıdy Kazinform agenttiginiń Beıjińdegi menshikti tilshisi China Daily basylymyna silteme jasap.
Qytaıda bıylǵy birinshi jartyjyldyqta nekege turýshylar sany azaıyp, ajyrasýshylar sany artqan. Bul týraly Qytaıdyń Azamattyq ister mınıstrliginiń derekteri kórsetip otyr.
Jyldyń alǵashqy alty aıynda elde 3,28 mıllıon neke tirkelgen. Bul ótken jyldyń sáıkes kezeńindegi 3,54 mıllıon kórsetkishten 260 myńǵa az. Al osy kezeńde ajyrasý sany 52 myńǵa ósip, 1,38 mıllıonǵa jetken. Byltyr alǵashqy alty aıda 1,33 mıllıon ajyrasý tirkelgen bolatyn.
Bul tómendeý 2025 jylǵy mamyrda nekeni tirkeýdi azamattyń turǵylyqty jerine baılanystyrýdy alyp tastaǵan jalpyulttyq erejeler engizilgenine qaramastan oryn alyp otyr. Endi QHR azamattary eldiń kez kelgen azamattyq hal aktilerin tirkeý bóliminde (AHAT) nekege tura alady.
Qytaıda neke sany 2013 jyly tirkelgen rekordtyq kórsetkishten keıin turaqty túrde tómendep keledi. Sol jyly 13,47 mıllıon jup nekesin resmı túrde tirkegen. 2019 jyly bul kórsetkish 10 mıllıonnan tómendedi, al 2022 jyly 6,84 mıllıonǵa deıin túsip, eń tómengi deńgeıge jetti. 2023 jyly kórsetkishtiń qysqa merzimdi ósimi baıqalyp, 7,68 mıllıonǵa jetkenimen, bul jalpy tómendeý úrdisin ózgerte almady.
Buǵan deıin Qytaıdyń aýyldyq jerlerde qalyńmal kólemi men úılený toılaryna jumsalatyn shyǵyndardy shektep jatqany habarlanǵan bolatyn.
