Qytaılyq júrgizýshisiz taksıler Eýropada alǵash ret Londonda synalady

LONDON. KAZINFORM – Qytaıdyń júrgizýshisiz taksıleri 2026 jyldan bastap London kóshelerinde synaq rejıminde iske qosylýy múmkin, dep habarlaıdy Kazinform menshikti tilshisi.

Amerıkalyq taksı shaqyrý servısteri Uber men Lyft qytaılyq Baidu kompanııasymen áriptestik týraly kelisimge keldi. Taraptar tolyqtaı robottandyrylǵan Apollo Go RT6 elektrmobılderin synaqtan ótkizýdi josparlap otyr. Yntymaqtastyq aıasynda Baidu avtokólikteri Uber men Lyft qosymshalary arqyly qoljetimdi bolyp, Londondaǵy jelilerde jumys istemek.

Baidu bul salada edáýir tájirıbege ıe. Kompanııanyń Apollo Go júrgizýshisiz taksı servısi búginde 22 qalada, negizinen Qytaı aýmaǵynda qyzmet kórsetip keledi. Osy ýaqyt ishinde avtonomdy kólikter 17 mıllıonnan astam sapar jasaǵan.

Lyft kompanııasynyń basshysy Devıd Rısherdiń aıtýynsha, London turǵyndary Eýropada alǵash ret qytaılyq júrgizýshisiz taksı qyzmetin paıdalanýy múmkin. Bılik ruqsat bergen jaǵdaıda, bastapqy kezeńde birneshe ondaǵan kólik jolǵa shyǵyp, keıin olardyń sany júzdegen birlikke deıin artady.

It’s official: @lyft and @Baidu_Inc are bringing AVs to London 🇬🇧

Riders across the city will be the first in the region to experience Baidu’s Apollo Go vehicles. We expect to start testing our initial fleet with dozens of vehicles next year - pending regulatory approval -… pic.twitter.com/3hFTq3aoDk

— David Risher (@davidrisher) December 22, 2025

Ulybrıtanııanyń kólik mınıstri Heıdı Aleksander bul bastamany eldiń júrgizýshisiz kólik tehnologııalaryn damytý jolyndaǵy durys baǵytyn kórsetetin qadam dep baǵalady. Ol jańa tehnologııany engizý birtindep júzege asatynyn jáne qaýipsizdik basty basymdyq bolatynyn atap ótti.

Another vote of confidence in our plans for self-driving vehicles from global leader @Lyft.

We’re planning for self-driving cars to carry passengers for the first time from Spring, under our pilot scheme – harnessing this technology safely and responsibly to transform travel. https://t.co/XZcoHJGS50

— Heidi Alexander MP (@Heidi_Labour) December 22, 2025

Sonymen qatar Uber londondyq Wayve kompanııasymen de yntymaqtastyq ornatqan. Bul startap 2026 jyly júrgizýshisiz kólikterdi synaqtan ótkizýdi josparlap otyr. Reuters agenttiginiń jazýynsha, Wayve shamamen 1 mlrd dollar ınvestıtsııa tartqan.

Qazirgi tańda Wayve aldyn ala júktelgen kartasyz, naqty ýaqyt rejıminde baǵdar tabýǵa múmkindik beretin jasandy ıntellekt tehnologııasyn synap jatyr. Testileý Londonnyń kúrdeli kóshelerinde júrgizilýde. Bul kompanııaǵa júrgizýshisiz kólik ázirleý salasyndaǵy iri jahandyq oıynshylarmen básekelesýge múmkindik beredi.

Ulybrıtanııa júrgizýshisiz kólikter úshin synaq alańyna 2024 jyly qabyldanǵan avtomattandyrylǵan kólik quraldary týraly zańnyń arqasynda aınalyp otyr. Atalǵan qujat jol-kólik oqıǵalary kezinde jaýapkershiliktiń kimge júkteletinin naqty aıqyndaıdy. Al Eýropalyq odaq elderinde mundaı biryńǵaı zań áli qabyldanǵan joq.

Sonymen birge sarapshylar júrgizýshisiz taksılerdiń ekonomıkalyq tıimdiligi men qaýipsizdigine qatysty alańdaýshylyq bar ekenin aıtady. Reuters dereginshe, Pony.ai jáne WeRide sııaqty qytaılyq avtonomdy kólik kompanııalary áli de shyǵynmen jumys istep otyr. Al mamandar júrgizýshisiz avtoparkterdiń joǵary quny Uber men Lyft sekildi servısterdiń tabystylyǵyna keri áser etýi múmkin ekenin eskertedi.

London ýnıversıtettik kolledjiniń professory Djek Stılgoýdyń aıtýynsha, birneshe kólikti synaý bir bólek, al ony tolyqqandy ári senimdi qoǵamdyq kólikke aınaldyrý múlde basqa másele.

Saýalnamalarǵa sáıkes, brıtandyqtardyń shamamen 60 paıyzy qandaı jaǵdaı bolmasyn júrgizýshisiz taksıge otyrmaıtynyn aıtqan. Al 85 paıyzy baǵa men yńǵaılylyq birdeı bolǵan jaǵdaıda júrgizýshisi bar taksıdi tańdaǵan.

Buqaralyq aqparat quraldarynda júrgizýshisiz kólikterdiń jumysyna qatysty aqaýlar jóninde de jıi habar taraıdy. Keı jaǵdaıda mundaı kólikter jolda toqtap qalyp, keptelis týdyrady nemese apatqa ushyraıdy. Mysaly, jýyrda Waymo servısi elektr qýatynyń óshýine baılanysty San-Frantsıskodaǵy qyzmetin ýaqytsha toqtatýǵa májbúr bolǵan.

Sarapshylardyń pikirinshe, mundaı tehnologııalardy engizýmen qatar qaýipsizdik, derekterdi qorǵaý jáne qozǵalysty retteý boıynsha naqty standarttar qalyptastyrý mańyzdy.

Aıta keteıik, London qala ortalyǵyndaǵy jol keptelisimen uzaq jyldardan beri kúresip keledi. Professor Stılgoýdyń aıtýynsha, keptelis turǵysynan alǵanda «bir jolaýshysy bar kólikten de jamany – ishinde múlde jolaýshysy joq avtomobıl».

Buǵan deıin júrgizýshisiz taksı qyzmeti Doha men Dýbaı qalalarynda iske qosylǵan bolatyn.

Al Qazaqstanda Májilis depýtaty Elnur Beısenbaev taksı naryǵyn «kóleńkeli aımaqtan» shyǵarýǵa shaqyrǵan edi.