Qytaılyq tanymal bloger Mańǵystaýǵa qaıta keldi
ASTANA. KAZINFORM – Qytaılyq tanymal model ári saıahatshy-bloger Taotao Aıma Instagram jelisinde 3 mıllıonǵa jýyq oqyrmany bar. Ol Mańǵystaý oblysy týraly birneshe beınerolık túsirip, óńirdiń kórikti jerlerin kórsetti. Bul týraly Mańǵystaý oblysynyń Qoǵamdyq kommýnıkatsııalar ortalyǵy habarlaıdy.
Áleýmettik jeli qoldanýshylary blogerdi batyl obrazy úshin «Jas Mýlan» dep atap ketken.
Jańa vıdeolarynda Taotao ulttyq kıim kıip, Bozjyra shatqalynyń aq jartastary men Boqty taýy aıasynda qolyna búrkit ustap túsken. Torysh alqabynda ol tazy tuqymdy ıtpen birge tas sharlardyń arasynda serýendegen. Al Kaspıı teńizi jaǵalaýynda qara tulparmen shaýyp ótken.
Aıta keteıik, Taotao atqa nyq otyrady jáne saıatshylyq ónerin jetik meńgergen. Óz jarııalanymdarynda ol tabıǵat úılesimi men ulttyq dástúrlerdiń baılyǵyn nasıhattaıdy.
Bloger Mańǵystaý óńirine ekinshi ret kelip otyr. Uıymdastyrýshylardyń aıtýynsha, ol arnaıy Amal merekesine shaqyrylǵan. Atalǵan mereke Otpan taýynda ótken.
Buǵan deıin qytaılyq tanymal blogerdiń Qazaqstan týrızminiń ambassadory atanǵany habarlanǵan edi. 2025 jyly Taotaoǵa «Qazaqstan týrızminiń elshisi» qurmetti mártebesi berildi. Ol buǵan deıin Astana, Almaty qalalary men Shyǵys Qazaqstan oblysy jáne Almaty oblysynyń kórikti jerlerinde bolǵan.
Aıta keteıik, álemdik áýen Bozjyrada áýelep, tanymal pıanıstiń erekshe jobasy eldi tánti etti.
Al Dımashtyń mýzykalyq jobasy Kaspıı men Bozjyranyń sulýlyǵyn álemge pash etti.
Sondaı-aq 2023 jyly tanymal DJ Bozjyra shatqalynda beınebaıan túsirdi.