Qytaılyq stýdent JI arqyly serıal túsirip, mıllıondaǵan tabys tapty
ASTANA. KAZINFORM — Sýchjoý ýnıversıtetiniń úshinshi kýrs stýdenti JI kómegimen anımatsııalyq serıaldar túsirip, bir jylǵa jetpeıtin ýaqytta 3 mıllıon ıýannan (450 myń dollar) astam tabys tapty, dep habarlaıdy Kazinform agenttiginiń menshikti tilshisi jergilikti BAQ-qa silteme jasap.
Sıao Tıanle stýdentter jataqhanasyndaǵy bir kompıýterden bastaǵan isin JI kómegimen qysqametrajdy serıaldar shyǵaratyn jobaǵa aınaldyryp, júzdegen týyndy ázirledi. Komandasynyń eń tabysty serıaly 1,5 mıllıard qaralym jınap, 2 mıllıon ıýannan astam tabys ákeldi.
Sıaonyń sózinshe, JI algorıtmderi kúndelikti qaıtalanatyn jumystardy atqarýǵa, sýret pen dybys jasaýǵa jáne bastapqy mátinderdi ázirleýge kómektesedi. Al sońǵy montaj, oqıǵanyń baıandalý yrǵaǵyn úılestirý jáne JI jasaǵan olqylyqtardy túzetý adam qolynda qalady.
– JI kúndelikti qaıtalanatyn kóptegen jumysty jeńildetedi, biraq oqıǵany baıandaıtyn adamnyń ornyn basa almaıdy, – dedi ol.
Stýdent ýnıversıtetti támamdaǵannan keıin rejıssýra men dramatýrgııa boıynsha bilimin jalǵastyryp, qysqametrajdy kontentten tolyqmetrajdy kıno túsirýge kóshýdi jáne ulttyq prokat kýáligin alýdy kózdep otyr.
Sıaonyń tabysy Qytaıda JI kómegimen túsiriletin shaǵyn serıaldar naryǵynyń qarqyndy damyp jatqanyn kórsetedi. DataEye saraptamalyq kompanııasynyń málimetinshe, 2026 jyly bul naryqtyń kólemi 40 mıllıard ıýanǵa (6 mıllıard dollar) jetip, kórermender sany 600 mıllıonnan asqan.
Buǵan deıin Qytaıda JI kómegimen túsirilgen alǵashqy tolyqmetrajdy fılm kórermen jınaı almaǵanyn habarlaǵan bolatynbyz.
