Qytaılyq sómkemen tasydy: Perızat Qaırat qor qarjysyn qalaı qolma-qol aqshaǵa aýystyrdy
ASTANA. KAZINFORM – Astanada qaıyrymdylyq qordyń burynǵy jetekshisi, volonter Perızat Qaırat pen onyń anasy Ǵaını Alashbaevaǵa qatysty sot otyrysynda kýágerlerden jaýap alý protsesi jalǵasyp jatyr.
Kýáger Ádilhan Mýsınniń málimdeýinshe, ol sottalýshy Perızat Qaıratpen birneshe ret kezdesip, qor qarjysyn jeke kásipkerlikterdiń shoty arqyly qolma-qol aqshaǵa aýdarǵan.
- Qansha ret bolǵany, naqty esimde joq, óıtkeni kezdesý sáýir-mamyr aılarynda ótti. Biraq keıin aqshany men tapsyrdym, shataspasam, úsh kezdesý bolǵan sııaqty. Dál barlyq somany ataı almaımyn, shamamen, bir jeke kásipker orta eseppen 70 mıllıon teńge alǵan. Umytpasam, 12 - 13 jeke kásipker boldy. Meniń túsinýimshe, eger jeke kásipker belgili bir somaǵa shart jasassa, ol bul somany bir rettik aýdarymmen ala alǵan. Al eger shartta qandaı da bir eskertý bolsa, ol kezde eki transhpen jibere alǵan. Biraq túsingenim jeke kásipkerlerdiń kóbisi aqshany bir rettik aýdarymmen alǵan, - dedi Ádilhan Mýsın sotta.
Onyń aıtýynsha, qolma-qol aqshany kúdikti Perızat Qaırattyń ózi alyp júrgen.
- Aqshany Perızattyń ózi alyp júrdi. Yńǵaıly bolý úshin biz aqshany sómkelerge salatynbyz. Sebebi bank bizge aqshany býylǵan kúıinde beretin. Olardy sómkege salǵan yńǵaılyraq edi. Bul sómkeler keıin ózine jeke tabystalyp, kólikke júkteletin, - deıdi ol.
Osy oraıda prokýror kýágerden aqshanyń qandaı sómkemen tasyǵanyn naqtylady.
- Kádimgi qytaılyq tor sómkeleri, - dep qysqa qaıyrdy Á.Mýsın.
Sondaı-aq kýáger shamamen 210 mıllıon teńge qolma-qol aqshaǵa aınalǵanyn aıtty.
Belgili bolǵandaı, tasqyn kezinde Nazarbaev zııatkerlik mektebiniń qyzmetkerleri 2,9 mln teńge joldaǵan.
Іsti qaraý kezinde Perızat Qaırat jetekshilik etken qorǵa qarjy aýdarǵan 47 adam jábirlenýshi dep tanyldy.
Buǵan deıin kúdikti Perızat Qaırat basqarǵan qaıyrymdylyq qoryna Nazarbaev mektebininiń ata-analary shamamen 1 mln teńge jınap bergeni týraly jazǵan bolatynbyz.
Odan bólek Perızat Qaırat jetekshilik etken qorǵa taǵy bir qurylys kompanııasy qorǵa 200 mln teńge aýdarǵan.
Keshe ótken sot otyrysynda Forte Bank marketıng dırektory Anton Kım tasqyn kezinde Perızat Qaırattyń qoryna jeke shotynan jarty mıllıon teńge aýdarǵanyn aıtqan edi.
Sot otyrysynda belgili bolǵandaı, Perızat Qaırat anasyn ortaǵa salyp, 23 mln teńgege gúl bıznesin satyp alǵan.
Sonymen qatar «Asar-Úme» qorynyń prezıdenti Ashat Nurmashev kúdikti Perızat Qaıratqa 200 mln teńge aýdarǵanyn aıtty.
Sondaı-aq tanymal bloger Oljas Sadyq sotta kýálik etý barysynda Perızat Qaıratqa 83,5 mln teńgege aldanǵanyn aıtty.
Aıta ketsek, Úkimet basshysy Oljas Bektenov Perızat Qaırattyń ústinen qozǵalǵan iske qatysty pikir bildirdi.