Qytaılyq seriktestermen munaı-gaz salasynda kóptegen jobany júzege asyryp jatyrmyz – Prezıdent

ASTANA. KAZINFORM – Qasym-Jomart Toqaev sońǵy jyldary memleket ekonomıkanyń túrli salasyna shetel ınvestıtsııasyn júıeli túrde tartý jumysyna erekshe nazar aýdaryp otyrǵanyn jetkizdi. Bul týraly Aqordanyń baspasóz qyzmeti habarlady. 

– Osy rette jaqynda ótken Qytaıǵa saparymdy atap ótkim keledi. Bul sapar shyn máninde óte jemisti boldy. Eki eldiń arasyndaǵy strategııalyq seriktestikke myqty ári tyń serpin berdi. Ekijaqty kelissózderdiń kún tártibi aýqymdy jáne eń bastysy Qazaqstannyń ulttyq múddelerine, eń aldymen, ekonomıka salasyndaǵy múddelerine tikeleı baılanysty boldy. Qytaı Halyq Respýblıkasynyń Tóraǵasy Sı Tszınpınmen áńgimelesý kezinde máńgilik dostyq pen strategııalyq seriktestik rýhyndaǵy jan-jaqty yntymaqtastyqqa erekshe mán berildi. Qazaq-qytaı iskerlik keńesiniń kezekti otyrysynyń qorytyndysy boıynsha jalpy somasy 15 mıllıard dollar bolatyn jetpisten astam kommertsııalyq qujatqa qol qoıyldy. Qytaılyq seriktestermen birge munaı-gaz salasynda kóptegen joba júzege asyrylyp jatyr. Sondaı-aq strategııalyq sıpattaǵy jańa jobalar josparlanǵan. Onyń ishinde Aqtóbe oblysynda karbamıd shyǵaratyn gaz-hımııa kesheniniń qurylysy jóninde SNPC kompanııasymen jasalǵan kelisimdi erekshe atap ótkim keledi. Joba quny 1 mıllıard dollardan asady. Atyraý oblysynda etan jáne propan tasymaldaýǵa arnalǵan magıstraldi qubyr qurylysyn qarjylandyrý boıynsha Qytaı damý bankimen jasalǵan ýaǵdalastyqtyń da mańyzy zor. Kelisimniń jalpy somasy – 530 mıllıon dollarǵa jýyq. Biz barlyq halyqaralyq ınvestorlarmen yqpaldastyqty tereńdetýge árdaıym basa mán beremiz. Munaı-gaz salasynda amerıkalyq, reseılik, eýropalyq jáne qytaılyq korporatsııalarmen kóp jyldar boıy jalǵasyp kele jatqan seriktestik – sonyń aıqyn dáleli, – dedi Memleket basshysy. 

Buǵan deıin Memleket basshysynyń munaı-gaz salasynyń qyzmetkerlerin kásibı merekesimen quttyqtaǵanyn jazǵan edik.