Qytaılyq saıahatshy qyz velosıpedpen Qazaqstandy aralaýǵa shyqty
AQTAÝ. KAZINFORM — Qytaıdyń Shyńjań ólkesinde dúnıege kelgen qandasymyz Búrlen Ádiletqyzy Qazaqstandy velosıpedpen aralaýdy bastady. 21 jastaǵy velosaıahatshy aldymen Aqtaýǵa kelip, birneshe kún boıy Kaspıı teńiziniń jaǵasyndaǵy shahardyń kórikti jerlerimen tanysty. Aldaǵy ýaqytta ol Beket ata jáne Shopan ata jerasty meshitteri sekildi kıeli oryndarǵa baryp, minájat etýdi josparlaıdy.
Odan keıin saıahatshy Batys Qazaqstan óńirlerin aralap, eldiń barlyq oblystaryna barýdy kózdeıdi. Onyń aıtýynsha, sapardyń negizgi maqsaty — qazaq halqynyń salt-dástúri men tarıhyn tereńirek tanyp-bilý, sondaı-aq jergilikti turǵyndarmen júzdesý.
— Osy jolǵy saparymda aldyńǵyǵa qaraǵanda azdap ýaıym bar. Sebebi qazaq elin tolyq túsinip jatqan joqpyn. Endi osy sapar arqyly eldi tanyp, túsingim keledi. Marshrýt jasaǵanda eldimekenderdiń arasy óte alys ekenin baıqadym. Basqa qorqynysh joq, tek jolda qasqyr kezdespese eken dep tileımin, — deıdi velosaıahatshy Búrlen Ádiletqyzy.
Búrlen Ádiletqyzy sapar barysynda alǵan áserlerin áleýmettik jelilerde bólisip otyratynyn jetkizdi.
Aıta keteıik, velosaıahatshy 2024 jyly Úrimshi qalasynan Astana qalasyna deıin 26 kúnde jetken. Sol saparynda ol óz velosıpedin Tuńǵysh Prezıdent mýzeıiniń qoryna tapsyrǵan.
Buǵan deıin, Mańǵystaýda Bozjyra shatqalynda vızıt ortalyqtyń qurylysy aıaqtalǵanyn jazǵan bolatynbyz.
