Qytaılyq sarapshy: Halyqaralyq senimdi qalpyna keltirý dıalog pen úılestirýdi talap etedi

ASTANA. KAZINFORM – Qytaı Memlekettik keńesi janyndaǵy Damý zertteý ortalyǵynyń Eýropa jáne Azııanyń áleýmettik damýy ınstıtýty Ǵylymı keńesiniń tóraǵasy Lı ıÝntsıýan 15 qazan kúni  ІІ Astana Think Tank Forum-2025 halyqaralyq forýmda sóz sóılep, «qyrǵı-qabaq soǵystan» keıingi álemdik qurylymnyń transformatsııasyn taldady.

Onyń aıtýynsha, qyrǵı-qabaq soǵys aıaqtalǵannan keıin álem shamamen otyz jyldyq birpolıarly kezeńdi bastan ótkerdi, alaıda bul qurylym qazir ózgeris ústinde.

— Birpolıarly júıeniń qalyptasýyna jahandaný úderisi, tehnologııalyq serpilis, Qytaıdyń naryǵyn ashýy jáne Keńes Odaǵynyń ydyraýy áser etti, - dedi ol.

Lı ıÝntsıýan qazirgi halyqaralyq jaǵdaıdy sıpattaı kele, álemde birneshe kúsh ortalyǵy qatar paıda bolǵanyn, alaıda olardyń ózara is-qımyly áli de tıimdi úılestirilmegenin atap ótti.

Sonymen birge ol klımattyń ózgerýi, terrorızm jáne óńirlik qaqtyǵystar sııaqty jahandyq syn-qaterler tek birlesken áreket arqyly ǵana sheshilýi múmkin ekenin aıtty. Alaıda is júzinde iri derjavalar kedendik tarıfter men sanktsııalyq teketiresterge áli de táýeldi bolyp otyrǵany halyqaralyq yntymaqtastyqqa kedergi keltiretinin jetkizdi.

Óz sózinde ol Globaldy Ońtústik elderi barlyq memlekettiń múddesin eskeretin jańa álemdik tártipti qalyptastyrýǵa umtylyp otyrǵanyn, al birneshe kúsh ortalyǵynyń paıda bolýy halyqaralyq júıeniń bir ortalyqqa baǵynyshty bolýyn shekteı túskenin atap ótti.

— Orta deńgeıdegi memleketter jahandyq úderisterdegi óz rólin túsine bastady. Bolashaq álemdik qurylym bir ortalyqqa baǵynbaı, úılestirý men dıalogty qajet etetin kezeńge ótedi, — dedi Lı ıÝntsıýan.

Aıta keteıik, elordada ІІ Astana Think Tank Forum-2025 halyqaralyq forýmy ótip jatyr. Іs-shara aıasynda Ortalyq Azııa saraptamalaryn álemdik zertteý qaýymdastyqtarmen biriktiretin platforma iske qosyldy.