Qytaılyq robottar kólikti bir mınýtta qurastyrady – sheteldegi qazaq baspasózi
Kazinform HAA sheteldegi qazaq tilinde taraıtyn aqparat kózderine aptalyq sholýyn usynady.
Stanbulǵa óte kóp týrıst keldi – TRT
Túrkııa ekonomıkasy ósti. Túrkııa Statıstıka mekemesi bıylǵy jyldyń birinshi toqsanyndaǵy (qańtar-naýryz kezeńi) el ishindegi taza ulttyq kirisi nátıjelerin jarııalady. Sáıkesinshe, taza ulttyq kiris 2024 jyldyń birinshi toqsanynda ótken jyldyń sáıkes toqsanymen salystyrǵanda 5,7 paıyzǵa ósti, dep habarlaıdy Túrkııa Radıo Televızııa portaly.
Atalǵan basylymnyń keltirgen málimetine súıensek, 2024 jyldyń birinshi toqsanynda ótken jylmen salystyrǵanda qurylys 11,1 paıyzǵa, aqparat jáne baılanys qyzmeti 5,5 paıyzǵa, ónerkásip 4,9 paıyzǵa, aýyl sharýashylyǵy 4,6 paıyzǵa, jyljymaıtyn múlikpen aınalysý 2,5 paıyzǵa, qarjy saqtandyrý qyzmeti 2 paıyzǵa ósti.
Sondaı-aq osy aptada «TRT» basylymynda «Stanbulǵa óte kóp týrıst keldi» degen taqyryptaǵy aqparat jaryq kórdi.
Túrkııalyq BAQ-tyń dereginshe, álemdegi eń kóp týrıst keletin qalalardyń biri Stanbul 2024 jyldyń alǵashqy 4 aıynda kelýshiler rekordyn jańartty.
Mádenıet jáne týrızm mınıstrliginen jasalǵan málimdemege qaraǵanda Stanbul qańtar, aqpan, naýryz jáne sáýir aılarynda 5 mıllıon 244 myń 936 sheteldik qonaqty qabyldaǵan.
Stanbulǵa kelgen sheteldikterdiń sany ótken jyldyń sáıkes kezeńimen salystyrǵanda 9,94 paıyz artty.
Sáýir aıynda ótken jyldyń sáıkes aıymen salystyrǵanda 14,60 paıyz artyp 1 mıllıon 478 myń 218 sheteldik qonaqty qabyldaǵan Stagbul Túrkııa týrızminiń lokomotıvi boldy.
Atap aıtqanda, sáýir aıynda Stanbulǵa eń kóp týrıst Reseı, Germanııa, Iran, AQSh qatarly elderden kelgen.
Qytaılyq robottar bir kólikti shamamen bir mınýtta qurastyrady – «Halyq gazeti»
Chongqing Changan Automobile kompanııasy Lıantszıan zaýytynyń ıkemdi óndiristik jelisinde robottar óz mindetterin yjdaǵatpen oryndap jatyr. Dánekerleý óndirisiniń jelisi bir ýaqytta tórt túrli úlgidegi kólikti shyǵara alady, dep habarlaıdy Qytaıdyń «Halyq gazeti».
Qytaılyq basylymnyń keltirgen derekterine súıensek, bul «tsıfrlyq ıntellekt» zaýyty avtomattandyrýdyń, tsıfrlandyrýdyń jáne ıntellektýaldy jumystyń joǵary deńgeıin júzege asyrady. Olar bir avtomobıldi shamamen bir mınýt ishinde qurastyrady eken.
Sonymen qatar osy aptada «Halyq gazeti» basylymynda «1 adam bir ýaqytta 12 kólikti júrgize alady degen ras pa?»degen taqyryptaǵy aqparat jaryq kórgen bolatyn.
Atalǵan basylymnyń dereginshe, port aımaǵynda ornalasqan smart-kollektsııalyq júk kólikteri kabınada eshkim joq bolsada olar emin-erkin, retpen qatynap júr.
«Týra júrińiz, burylyńyz, toqtańyz, jol berińiz... Nınbonyń Chjoýshan portynyń Meıshan port aýmaǵynda 62 smart-kollektsııalyq júk kólikteri port aımaǵynda ornalasqan, olar emin-erkin, retpen qatynap júr, al kabınada eshkim joq. Bulardyń «júrgizýshileri» qaıda ketti? «Halyq gazetiniń» tilshilerimen birge «Damyp jatqan Qytaı» Chjetszıanǵa suqbat tobyna ilesip, smart-kollektsııalyq júk kólikteri qalaı júrgizýshisiz júrip jatqanyn kórińizder!», - dep jazady qytaılyq basylym.
Iran prezıdenttik saılaýyna úmitkerlerdi tirkeý jalǵasyp jatyr – Parstoday
Irandaǵy prezıdenttik saılaýdyń 14-shi merzimine úmitkerlerdi tirkeý ótken beısenbi tańerteń eldiń saılaý shtabynda bastaldy.
14-shi prezıdenttik merziminen buryn saılaýy Iran prezıdenti Seıed Ibrahım Raısı tikushaq apaty saldarynan sháhıd bolǵannan keıin maýsymnyń 28-i juma kúni ótedi. Úmitkerlerdiń 30 mamyrdan bastap 5 kún boıy tirkelý múmkindigi bar.
Bul týraly Irannyń «Parstoday» aqparat agenttigi de habarlady.
Atalǵan basylymnyń keltirgen málimetine súıensek, Irannyń Іshki ister mınıstri Ahmad Vahıdıdiń buıryǵymen prezıdenttik on tórtinshi merzimge saılaý naýqany bastalǵan.
«14-shi prezıdenttik saılaýǵa tirkelýdiń birinshi kúni 5 adam jáne ekinshi kúni 4 adam tirkeldi. Eki kúnde saılaýaldy shtabynda 9 adam resmı tirkelse, búgin 3 adamdy qosqanda 12 adam saılaýaldy shtabynda tirkelgeni rastaldy», - dep jazady ırandyq BAQ.
Osy aptada «Parstoday»-de «Kıparıs kóleńkesinde» ırandyq anımatsııa ıspandyq marapattardy jeńip alǵannan keıin endi Oskarǵa úmitkerler tiziminde» degen aqparat jarııalandy.
Aıta keteıik, ishki jáne halyqaralyq festıvalderden ondaǵan halyqaralyq marapattarǵa ıe bolǵan bul ırandyq anımatsııa jaraqattan keıingi kúızelisten zardap shegetin kapıtan týraly.
«Parstoday»-diń málimetinshe, «Kıparıs kóleńkesinde» ırandyq anımatsııa 19-shy ıspandyq «Anımaıo» anımatsııalyq festıvaliniń bas júldesi men úzdik 2D anımatsııa júldesin alyp, 2025 jylǵy Oskar baıqaýyna úmitkerler tizimine tikeleı engen.
Irandyq balalardyń zııatkerlik damýy ortalyǵynyń qoǵammen baılanys jáne halyqaralyq ister jónindegi bas bóliminiń málimetinshe, bul úlken jetistik týraly habardy álem kınosynyń eń senimdi jańalyqtaryn taratatyn Variety Cinema Jahan jýrnaly bergen.
Ózbekstannan 2 myń jyldyq tarıhy bar qala qaldyqtary tabyldy - «ÓzA»
Ózbekstan-Qytaı birlesken arheologııalyq ekspedıtsııasy júrgizgen zertteý barysynda Surhandarııa oblysynyń «Ýzýn» aýdanynda 4 myń jyldyq tarıhy bar beıitter men 2 myń jyldyq qala qaldyqtary tabyldy, dep habarlaıdy ózbekstandyq «ÓzA» aqparattyq agenttigi.
Ózbekstandyq BAQ-tyń habarlaýynsha, zertteý barysynda ártúrli qysh ydystar, qarý-jaraq, zergerlik buıymdar, músin, qala munaralarynyń qaldyqtary jáne ártúrli kóne beıitter tabylǵan.
Sonymen qatar ǵalymdardyń aldyn ala tujyrymdary boıynsha bul arheologııalyq oljalar bizdiń dáýirimizge deıingi II-III ǵasyrlardaǵy qańly, kýshan jáne massaget dáýirlerine jatady.
Qazirgi tańda aýdanda Ózbekstan men Qytaıdyń birlesken arheologııalyq ekspedıtsııasynyń zertteý jumystary jalǵasýda.
Sondaı-aq osy aptada «ÓzA»-da «Ózbekstandaǵy alǵashqy bes juldyzdy qonaq úı satylymǵa shyǵaryldy» degen taqyryptaǵy aqparat jaryq kórgen bolatyn.
Atalǵan basylymnyń málimetinshe, Memlekettik aktıvterdi basqarý agenttigi «International Hotel Tashkent» qonaq úıiniń memleketke tıesili 100 paıyzdyq úlesin satý protsesi bastalǵanyn habarlaǵan.
Jekeshelendirý boıynsha keńesshi retinde Deloitte kompanııasy aınalysady eken.
Aıta keteıik, satylatyn qonaqúıde 232 bólme, 7 konferentsııa zaly, 2 meıramhana, barlar, jazǵy terrassa, fıtnes klýb jáne basseın bar. Jalpy jer kólemi 3 gektardy quraıtyn 44 903 sharshy metr aýmaqta ǵımarat jáne nysan bar.
Sonymen qatar «ÓzA» aqparattyq agenttigine «Ózbekstanda bir jylda murajaılarǵa 5,7 mıllıon adam kelgen» degen aqparat jarııalandy.
Basylymnyń habarlaýynsha 2023 jyly Ózbekstan aýmaǵyndaǵy murajaılarǵa 5,7 mıllıon adam kelgen.
Statıstıka agenttiginiń málimetinshe, bul kórsetkish ótken 2022 jylmen salystyrǵanda 800 myńǵa az.
Respýblıkadaǵy adamdar kóp baratyn 5 murajaılar – Regıstan ansambli, Samarqand memlekettik murajaı qoryǵy, «Jeńis saıabaǵy» memorıaldyq kesheni quramyndaǵy Memlekettik Dańq murajaıy qatarlylar eken.
Agenttik málimetinshe, 2024 jyl 1 qańtaryndaǵy málimet boıynsha Ózbekstandaǵy murajaılar sany 140-ty quraǵan. Murajaılarǵa 2020 jyly 1,5 mıllıon adam, 2021 jyly 5,1 mıllıon adam, 2022 jyly 6,5 mıllıon adam kelgen.
