Qytaılyq robottar endi úı sharýasymen aınalysady
ASTANA.KAZINFORM — Qytaıdaǵy gýmanoıdty robottar jartylaı marafonnan keıin kúndelikti úı jumysyn oryndaýǵa kóshti, dep habarlaıdy Reuters.
Qytaılyq robototehnıka ázirleýshileri adam tárizdi robottardy praktıkalyq turǵyda qoldanýǵa basymdyq berip, olardyń nazaryn áserli demonstratsııalardan kúndelikti tapsyrmalardy oryndaýǵa aýystyrady. Buǵan Beıjińde ótken X Square Robot startapynyń sońǵy tanystyrylymy dálel bola alady.
Іs-shara barysynda robottar qarapaıym áreketterdi senimdi oryndady — qoqys jınap, gúlderdi suryptady. Mundaı kórsetilim burynǵydaı akrobatıkalyq is-áreketterden áserli bolmasa da, salanyń damýyndaǵy jańa kezeńdi kórsetedi.
X Square Robot kompanııasynyń bas dırektory Van Tsıannyń aıtýynsha, robottardyń tehnıkalyq bazasy jetkilikti deńgeıde damyǵan, alaıda olardyń «ıntellekti» áli de artta qalyp otyr. Tipti bólme jınaý, ydys jýatyn mashınaǵa ydys salý nemese kıim búkteý sııaqty qarapaıym tapsyrmalardyń ózi robottar úshin úlken qıyndyq týdyrady.
Vannyń túsindirýinshe, júgirý sııaqty qaıtalanatyn qozǵalystardy avtomattandyrý ońaıyraq, sebebi olar aldyn ala boljanatyn jaǵdaıda oryndalady. Al naqty ortada zattardy basqarý joǵary dáldikti talap etedi — tipti mıllımetrdiń úlesindegi qate de búkil áreketti buzýy múmkin.
Bul máseleni sheshý úshin kompanııa 100-den astam úı sharýashylyǵyndaǵy derekterge negizdelgen Wall-B atty jasandy ıntellekt modelin ázirledi. Ol beıberekettik, úı janýarlary jáne basqa faktorlar sııaqty naqty jaǵdaılardy eskeredi.
X Square Robot kompanııasynyń shtab-páteri Shenchjen qalasynda ornalasqan. Startap jańa júıeni robot-shańsorǵyshtaryna mamyr aıynyń sońynda engizýdi josparlap otyr.
Sonymen qatar kompanııa 58.com platformasymen seriktestik ornatyp, Shenchjen turǵyndaryna robot kómegimen úı tazalaý qyzmetine tapsyrys berý múmkindigin usyndy. Úsh saǵattyq qyzmet quny 149 ıýan (shamamen 22 dollar). Kompanııa dereginshe, robottar 50-den astam úıde jumys istep úlgergen.
Aıta keteıik, gýmanoıd robot jartylaı marafonnan erler arasyndaǵy rekordty jańartty.