Qytaılyq robottar Brazılııadaǵy naýqasqa qashyqtan joǵary dáldiktegi ota jasady
ASTANA. KAZINFORM – Brazılııadaǵy naýqasqa Qytaıdaǵy aýrýhanada ornalasqan qashyqtan basqarylatyn robottandyrylǵan hırýrgııalyq júıe arqyly ota jasaldy. Dáriger Karlos Edýardo Domene Sychýan provıntsııasynyń ortalyǵy Chendý qalasynda bolyp, naýqastan 10 myń shaqyrymnan astam qashyqtyqta operatsııa júrgizdi, dep habarlaıdy TV BRICS arnasy.
Karlos Edýardo Domeneniń aıtýynsha, qurylǵy asa joǵary aıqyndyqtaǵy beıne men baılanys kezinde kidiristiń múlde bolmaýyn qamtamasyz etken.
Atalǵan ota naýryz aıynda Sychýan ýnıversıtetiniń Batys Qytaı aýrýhanasy janyndaǵy Halyqaralyq qashyqtan robottandyrylǵan hırýrgııa ortalyǵynda sátti jasalǵan jeti operatsııanyń qataryna endi.
Baýyr transplantatsııasy boıynsha sarapshy jáne aýrýhananyń vıtse-prezıdenti Ý Hýn sátti oryndalǵan operatsııalardyń ishinde gepatobılıarlyq júıege, ıaǵnı baýyr, ót qaby jáne ót joldaryna, sondaı-aq uıqybezge jasalǵan otalardyń erekshe oryn alatynyn atap ótti.
Chendýdaǵy ortalyq 21 naýryzda ashylǵan. Ol aqyldy hırýrgııanyń jahandyq platformasy retinde qurylyp, patsıentter iri medıtsınalyq ortalyqtarǵa barýǵa májbúr bolatyn júıeden joǵary tehnologııalyq kómekti jergilikti jerde kórsetý modeline kóshýge baǵyttalǵan.
Ý Hýnnyń sózinshe, mundaı júıe adamdardyń qarjylyq jáne ýaqyt shyǵynyn 80 paıyzǵa deıin qysqartady.
– Qytaıdyń ozyq medıtsınalyq tehnologııalary men jabdyqtary endi «Bir beldeý, bir jol» bastamasy aıasynda Brazılııada engizilip jatyr. Bul Ońtústik Amerıka boıynsha kóptegen naýqasqa paıdasyn tıgizýde, – dedi Domene.
Aıta keteıik, ol sondaı-aq Brazılııa robototehnıka qaýymdastyǵynyń prezıdenti.
Aýrýhana 2026 jyldyń shilde aıynda Mysyrda hırýrgııalyq robottardy qashyqtan basqarý ortalyǵyn ashýdy josparlap otyr. Bul tehnologııany elde engizýge jáne jergilikti dárigerlerdiń osy saladaǵy biliktiligin arttyrýǵa kómektesedi.
Qytaı medıtsınalyq tehnologııalarynyń shetelde keń kólemde engizilip jatqany eksport statıstıkasymen de rastalady.
Qytaı medıtsınalyq jabdyq óndirýshileri qaýymdastyǵynyń málimetine súıensek, ótken jyly Qytaıdan eksporttalǵan medıtsınalyq jabdyq kólemi 45,8 mlrd AQSh dollaryna jetken. Bul 2019 jylǵy kórsetkishten 62,4 paıyzǵa joǵary.
Eske sala ketsek, robototehnıka boıynsha álem chempıonatynyń júldegeri Álıhan Serikov Stanford ýnıversıtetiniń grantyn ıelendi.
