Qytaılyq robototehnıka salasyndaǵy JI startapy álemdik reıtıngte kósh bastady
ASTANA. KAZINFORM — Qytaılyq Spirit AI startapy óziniń jasandy ıntellektke arnalǵan irgeli modeli Spirit v1.5 álemdik robototehnıkalyq etalondyq test RoboChallenge reıtınginde birinshi oryn ıelengenin málimdedi, dep habarlaıdy Sınhýa agenttigi.
Bul model AQSh-ta ázirlengen jetekshi modeldi basyp ozdy.
RoboChallenge kóshbasshylar kestesine sáıkes, Spirit v1.5 jalpy esepte 66,09 ball jınap, tapsyrmalardy oryndaý tabystylyǵy 50,33 paıyzdy qurady. Osy kórsetkishpen ol amerıkalyq Physical Intelligence kompanııasy ázirlegen pi0.5 modelinen joǵary nátıje kórsetti.
Spirit AI kompanııasy kóshbasshy atanǵan modeldiń bastapqy kodyn jáne oǵan qatysty resýrstardy ashyq qoljetimdi etkenin habarlady.
Sala mamandary únemi «robottarǵa arnalǵan jahandyq emtıhan» dep ataıtyn RoboChallenge — bul naqty qurylǵylarda baǵalaý júrgizetin platforma. Ol jasandy ıntellekt modelderin fızıkalyq ortada synaıdy. Testileý úderisi kúndelikti operatsııalardy qamtıtyn 30 tapsyrmadan turady, onyń ishinde zattardy ornalastyrý, nysandardy taný jáne quraldardy paıdalaný sııaqty áreketter bar.
Jalpyǵa qoljetimdi nátıjelerge sáıkes, Spirit v1.5 platformada eń joǵary jalpy ball jınap qana qoımaı, tapsyrmalardy oryndaý tabystylyǵy 50 paıyzdan asqan jalǵyz model boldy.
Spirit AI kompanııasy Qytaıdyń shyǵysyndaǵy Chjetszıan provıntsııasynyń ákimshilik ortalyǵy Hanchjoý qalasynda qurylǵan. Bul qalada sondaı-aq DeepSeek jasandy ıntellekt startapy men adamtektes robottar shyǵaratyn Unitree Robotics kompanııasy ornalasqan. Spirit AI jasandy ıntellekt pen robototehnıka salasyndaǵy zertteýlerge mamandanǵan.
Chjetszıan tehnologııalyq ýnıversıtetiniń dotsenti Tsıý Tszefan birinshi oryn alǵan Spirit v1.5 modeliniń ámbebap robototehnıkalyq tapsyrmalardy oryndaýda jáne olardy naqty júzege asyrýda joǵary jalpy qabiletterin kórsetkenin atap ótti.
«Denedegi jasandy ıntellekt úshin ártúrli stsenarıılerde kóptegen tapsyrmalardy túsinip, oryndaı alý qabileti óte mańyzdy», dedi Tsıý Tszefan.
Ol tehnologııa áli aýqymdy túrde engizýge tolyq daıyn bolmasa da, bul nátıje praktıkalyq qoldanýǵa qaraı jasalǵan mańyzdy qadam ekenin aıtty.
Spirit AI kompanııasynyń negizin qalaýshy ári bas dırektory Han Fentao aldaǵy eki-úsh jyl ishinde servıstik robottardyń áldeqaıda keń aýqymy paıda bolady dep kútetinin jetkizdi.
Eske sala ketsek, byltyr qarasha aıynda qazaqstandyq oqýshylar Panamada ótken robototehnıka saıysynda tórt dúrkin álem chempıony atandy.