Qytaılyq robot rekord jańartty: 106 shaqyrymdy toqtaýsyz júrip ótti

ASTANA. KAZINFORM – Qytaıda gýmanoıdty robot toqtaýsyz 106 shaqyrym júrip, Gınnes rekordtar kitabyna endi, dep habarlaıdy Chinadaily.

Shanhaılyq Agibot kompanııasy ázirlegen A2 modeli 10 qarashanyń túninde Sýchjoý qalasynan jolǵa shyǵyp, 13 qarashanyń tańynda Shanhaıdaǵy áıgili Býnd jaǵalaýyna jetti.

Robottyń úzdiksiz qozǵalýyna qýat elementterin jyldam almastyrý júıesi múmkindik bergen. Resmı derekter boıynsha ol 106,286 shaqyrym jol júrgen.

Agibot vıtse-prezıdenti Van Chýane robottyń kórsetkishin joǵary baǵalady.

«Sýchjoý men Shanhaı arasyn jaıaý júrip ótý kóptegen adamdar úshin qıyn. Robottyń muny eńserýi onyń apparattyq bóligi men tepe-teńdik algorıtmderiniń jetilgenin, tózimdiligin dáleldeıdi. Bul keń kólemdegi kommertsııalyq qoldanýǵa berik negiz bolady», – dedi ol.

A2 roboty eki GPS modýlimen jáne ınfraqyzyl datchıktermen jabdyqtalǵan. Ol baǵdarshamdar, tar ótkelder, halyq kóp júretin trotýarlar sııaqty kúrdeli jaǵdaılarda da senimdi navıgatsııa kórsetip, kúndiz-túni qorshaǵan ortany turaqty qabyldaı alǵan.

Marshrýt barysynda robot asfalt joldarmen, plıtaly jaıaýjoldarmen, kópirlermen, taktıldik plıtkamen jáne pandýstarmen júrip, jol qozǵalysy erejelerin saqtaǵan.

Aıta keteıik, buǵan deıin amerıkalyq 1X kompanııasy úı sharýasyna kómektesýge arnalǵan álemdegi alǵashqy tutynýshylyq gýmanoıd robot – NEO úshin aldyn ala tapsyrys qabyldaýdy bastaǵanyn habarlaǵan edi.