Qytaılyq oıynshyq óndirýshi Labubu-dyń naryqtaǵy quny «Gazpromnan» asyp tústi

ASTANA. KAZINFORM –  Qytaılyq tanymal Labubu oıynshyǵyn óndiretin Pop Mart kompanııasynyń naryqtyq quny reseılik gaz alyby «Gazpromnyń» kapıtalızatsııasynan asyp tústi, dep jazdy  Kazinform agenttiginiń tilshisi «Bıznes Online» basylymyna silteme jasap. 

Basylym málimetinshe, 2025 jyldyń 22 shildesindegi jaǵdaı boıynsha, kollektsııalyq oıynshyqtar satýmen aınalysatyn qytaılyq rıteılerdiń aktsııalarynyń jalpy quny 42 mıllıard dollardy qurady. Al reseılik energetıkalyq kompanııanyń naryqtyq baǵasy 38,77 mıllıard dollar dep baǵalanyp otyr. Osylaısha, Pop Mart álemdik reıtıngte «Gazpromdy» 49 orynǵa artta qaldyrdy.

Labubu — 2015 jyly Gonkong sýretshisi Lýn Kasın jasaǵan elfke uqsaıtyn jaratylys. Bul kishkentaı, úlpildek monstrlar erekshe belgilerimen tanymal: kózderi úlken, qulaqtary úshkir jáne toǵyz tisi bar. Oıynshyqtyń tanymaldyǵy ótken jyldyń sońynda kúrt ósti — áıelder oıynshyqty sómkesine aksessýar retinde taǵyp shyǵýy áleýmettik jelilerde qyzý talqylanǵan bolatyn.

Buǵan deıin Ulybrıtanııada Labubu qýyrshaqtarynyń satylymy ýaqytsha toqtatylǵany habarlanǵan edi. Bul rekordtyq suranys aıasynda qyzmetkerler men satyp alýshylardyń qaýipsizdigine baılanysty jasaldy.

Eske sala keteıik, maýsym aıynda kerisinshe qoǵamda úlken qyzyǵýshylyq týdyrǵan bul brendtiń aınalasyndaǵy jaǵdaı kúrt ózgerip, oǵan qatysty aktsııalar baǵasy kúrt quldyraǵanyn jazǵan edik.