Qytaılyq oftalmologtar 4200 km qashyqtyqtan ota jasady
ASTANA. KAZINFORM – Qytaılyq dárigerler álem boıynsha alǵash ret robottandyrylǵan ota jasap, kóz torynyń astyna 4 200 shaqyrymnan astam qashyqtyqtan preparat engizdi. Bul týraly nf.news jazdy.
Gýanchjoýdaǵy Sýn ıAtsen ýnıversıteti Oftalmologııa ortalyǵynyń komandasy otany Úrimjidegi Shyńjań óndiristik-qurylys korpýsy bas aýrýhanasynyń mamandarymen birlesip júrgizdi. Hırýrgter 5G tehnologııasyn qoldana otyryp mıkroıneni naqty ýaqyt rejıminde basqaryp, kóz túbinde mıkrometrlik dáldikpen manıpýlıatsııalar oryndady.
Otandyq oftalmologııalyq robot Gýanchjoýdaǵy negizgi basqarý pýlti men Úrimjidegi ota bólmesi arasynda turaqty baılanysty qamtamasyz etip, bul 7 mınýttan az ýaqyt ishinde dáldigi joǵary ınektsııa jasaýǵa múmkindik berdi.
– 5G jelisi turaqty, keskin anyq boldy jáne ıne dirildemeı tegis qozǵaldy, - dep atap ótti mamandar.
Robottandyrylǵan platformany ázirleýge eki jyldan astam ýaqyt ketti. 2023 jyldyń maýsym aıynda komanda janýarlarǵa sátti eksperıment júrgizip, Úrimjide ótken alǵashqy klınıkalyq otaǵa jol ashty.
Mamandardyń aıtýynsha, sátti ota Qytaıdyń eksperımenttik kezeńnen telerobottyq oftalmologııalyq hırýrgııany klınıkalyq qoldanýǵa kóshýin belgiledi.
Buǵan deıin Qytaı Altsgeımerdi emdeýde eksperımentaldy hırýrgııaǵa tyıym salǵanyn jazǵan bolatynbyz.