Qytaılyq mashına jasaýshylar Qazaqstandaǵy óndiristi ınvestıtsııalaýǵa daıyn – Chjoý Haımın

ASTANA. KAZINFORM – Qytaı kompanııalary Qazaqstannyń mashına jasaý sektoryna, onyń ishinde negizgi komponentterdi jergilikti jerde óndiretin birlesken kásiporyndar qurýǵa qyzyǵýshylyq tanytyp otyr.

Bul týraly Qytaıdyń Halyqaralyq saýdaǵa járdemdesý komıteti janyndaǵy Mashına jasaý komıteti tóraǵasynyń orynbasary Chjoý Haımın Qazaqstan mashına jasaýshylarynyń XII forýmynda aıtty.

− Qazaqstan men Qytaı – jaqsy kórshiler, dostar ári seriktes elder. Bizdiń elder kóptegen jyldar boıy tyǵyz yntymaqtastyqta jumys istep keledi. Osylaısha 2024 jyly Qytaı Qazaqstannyń kóshbasshy saýda seriktesine aınaldy. Saýda aınalymy shamamen 44 mıllıard dollardy qurady, — dedi Ch. Haımın.

Spıkerdiń aıtýynsha, úsh myńnan astam qytaılyq kompanııa Qazaqstan ekonomıkasyna ınvestıtsııa salǵan. Bul rette mashına jasaý sektoryna erekshe nazar aýdarylyp otyr, sebebi bul sala eki eldiń de ekonomıkasynda birin-biri tolyqtyrady.

− Biz bul saladaǵy saýda kóleminiń de, ınvestıtsııa kóleminiń de joǵary ekenin kórip otyrmyz. Óndiristi odan ári damyta túsýge bolady. Oǵan qosa, jańǵyrtý jumystaryn da júrgize alamyz, — dep atap ótti Chjoý Haımın.

Ch. Haımın qazirdiń ózinde qytaılyq kompanııalar Qazaqstanda ınvestıtsııalyq jobalardy iske asyryp jatqanyn jáne birlesken kásiporyndar arqyly óz qatysýyn keńeıtýge daıyn ekenin atap ótti.

− Meniń oıymsha, mashına jasaý — yntymaqtastyq úshin bolashaǵy zor sala, — dedi Chjoý Haımın.

Aıta keteıik, Qazaqstan mashına jasaýshylarynyń XII forýmy 24-25 sáýir kúnderi Astanada ótedi. Forým otandyq mashına jasaý salasyn odan ári damytýǵa baǵyttalǵan usynystar men praktıkalyq usynymdar ázirleýdi kózdeıdi.

Sondaı-aq, elordada mashına jasaý jáne metall óńdeý boıynsha «Kazakhstan Machinery Fair 2024» halyqaralyq mamandandyrylǵan kórmesi ótip jatyr.

Buǵan deıin Premer-mınıstr Oljas Bektenov Qazaqstan Prezıdenti Qasym-Jomart Toqaevtyń quttyqtaý sózin oqyp bergen edi.