Qytaılyq Labubu brendi: tanymaldylyqtan daǵdarysqa deıingi jol
ASTANA. KAZINFORM - Keıingi kúnderi Qytaıdyń tanymal oıynshyq brendi Labubu-ǵa baılanysty jańalyqtar áleýmettik jelilerde ǵana emes, qarjy naryǵynda da qyzý talqyǵa tústi. Qoǵamda úlken qyzyǵýshylyq týdyrǵan bul brendtiń aınalasyndaǵy jaǵdaı kúrt ózgerip, oǵan qatysty aktsııalar baǵasy kúrt quldyrady.
Bul qubylysty keıbir derekter de bıznes máselesi ǵana emes, Qytaı jastary arasyndaǵy tutynýshylyq, mádenı jáne áleýmettik ózgeristerdiń belgisi retinde qarastyrýda.
Labubu degenimiz ne?
Labubu — Gonkongtik POP MART (泡泡玛特) kompanııasyna qarasty, sýretshi Kasing Lung oılap tapqan erekshe keıipker. Onyń usqynsyz ári súıkimdi beınesi, úlpildegen shashy men aıqaılap turǵandaı áser qaldyratyn bet álpeti jastardyń birden nazaryn aýdardy. Ádettegi oıynshyqtardan ózgeshe, Labubu 2019 jyldan bastap Qytaı men Azııa naryǵyna «soqyr qorap» (blind box) úlgisimen shyqty.
Brend ásirese pandemııadan keıin «ózińdi qýantý» (悦己消费) sekildi tutyný tendentsııasymen úndesip, jastar arasynda úlken tanymaldyqqa ıe boldy. POP MART 2020 jyly Gonkong bırjasyna tabysty túrde shyqty.
Aktsııalardyń quldyraýy jáne naqty sandar
2025 jyldyń maýsym aıynda kompanııa jarııalaǵan qarjy esebi ınvestorlar úmitin aqtamady. Sonyń nátıjesinde POP MART aktsııalary qysqa ýaqyt ishinde 20%-dan astam arzandap, naryqtyq quny shamamen 11 mıllıard gonkong dollaryna (shamamen 1.4 mlrd AQSh dollary) kemidi. Bul derek Bloomberg agenttiginiń maýsym aıynyń ortasynda jarııalaǵan esebinde kórsetilgen.
Jelide «Labubu dáýiri aıaqtaldy ma?», «bul tek sán be, álde jańa mádenıet pe?» degen pikirler kóbeıdi.
Qytaılyq BAQ-ta brendtiń tym kóp shyǵarylymy men jasandy tapshylyq arqyly qyzyǵýshylyqty ustap turý strategııasy endi burynǵydaı tıimdi emes ekenin aıtýda.
Áleýmettik jáne mádenı sebepter
Labubu fenomeni Qytaı qoǵamyndaǵy jastardyń emotsıonaldy qajettiligi men erekshe bolýǵa degen umtylysynan týǵan edi. Bul brend tek oıynshyq qana emes, ózindik mádenı kodqa aınaldy. Alaıda, qazirgi tańda Z urpaǵy tutynýshylyqta jańa basymdyqtarǵa kóshýde — olar endi ónimniń sapasyna, turaqtylyǵyna jáne shynaıylyǵyna kóbirek mán berýde.
Buryn «birden unady — birden aldym» qaǵıdasymen sıpattalǵan saýda mádenıeti birtindep «oılan — talda — tańda» qaǵıdasyna aýysyp barady. Osy ózgeristiń aıasynda Labubu sekildi sımvoldyq brendterdiń naryqtaǵy ornyn saqtaý qıyndaı tústi.
Labubu-dyń naryqtaǵy jaǵdaıy Qytaıdaǵy tutynýshylyq trendterdiń jańa kezeńge aıaq basqanyn ańǵartady. Bul — bir ǵana brendtiń quldyraýy emes, jalpy emotsıonaldyq tutyný mádenıetiniń betburysy. Bolashaqta qaı brendter osy ózgeristerge ıkemdelip, shynaıy qundylyqqa negizdele alsa — solar ǵana naryqta uzaq saqtalady.