Qytaılyq kompanııalardyń 70 paıyzy Almatyda jumys isteıdi — qala ákiminiń orynbasary
ALMATY. KAZINFORM — Qazaqstanda tirkelgen qytaılyq kompanııalaprdyń basym bóligi Almatyda jumys isteıdi. Bul týraly megapolıste ótip jatqan Qazaq Invest Forum-2025 forýmynda qala ákiminiń orynbasary Oljas Smaǵulov aıtty.
Almatyǵa Qazaqstannyń jalpy ishki óniminiń 21 paıyzdan astamy jáne memlekettik bıýdjettiń 26 paıyzy tıesili. 2019 jyldan beri qala ekonomıkasy 75 paıyzǵa ósip, 62 mlrd dollarǵa jetti. Byltyr Almatyǵa 8 mlrd dollardan astam sheteldik ınvestıtsııa tartyldy.
— Osyndaı jaǵdaıda bizdiń qala qytaılyq seriktester úshin ınvestıtsııanyń negizgi arnasyna aınalýǵa daıyn. Eki eldiń basshylyǵy arasyndaǵy úlgili qarym-qatynas pen qala ákimdiginiń jan-jaqty qoldaýy uzaq merzimdi yntymaqtastyqtyń berik negizi. Qazir Qazaqstanda tirkelgen qytaılyq kompanııalardyń 70%-ǵa jýyǵy Almatyda tabysty jumys isteıdi. Qala saýdasynyń úshten bir bóligi Qytaımen baılanysty jáne bul kórsetkish 8 mlrd dollarynan asty. Biz barlyq baǵyt boıynsha yntymaqtastyqty keńeıtýge zor áleýet bar ekenin kórip otyrmyz, — dedi ol.
Almaty elimizdiń týrıstik astanasy retinde de damyp keledi — 2025 jyly qalaǵa 750 myńnan astam sheteldik týrıst keledi dep josparlanyp otyr.
Taý klasterin damytý aıasynda 50-den astam jańa qonaqúıdiń qurylysy júrip jatyr. Onyń ishinde bes juldyzdy qonaqúıler de bar.
Qala ákiminiń orynbasary qytaılyq ınvestorlardy jobaǵa qosylýǵa shaqyrdy.
Oljas Smaǵulov logıstıka, tsıfrlandyrý jáne fınteh salalaryndaǵy múmkindikterdi atap ótti.
Osyǵan deıin 2 jyldyń ishinde Qazaqstan men Qytaı arasynda 90-nan astam kelisim, memorandým jáne kommertsııalyq qujat rásimdelgeni týraly jazǵanbyz.