Qytaılyq kompanııa elimizde kúrdeli gaz óndirýge 7,5 mlrd dollar ınvestıtsııa salady

Qujat aıasynda halyqaralyq kompanııa elimizdegi «Sozaq» ken ornynan kúrdeli gaz óndirýge 7,5 mlrd dollar ınvestıtsııa salady.

- Búgin Kazakh Invest kópjaqty yntymaqtastyq týraly memorgandýmǵa qol qoıdy. Qujat aıasynda elimizde alǵash ret kúrdeli gazdy barlaý, óndirý jáne tereń óńdeý boıynsha iri joba iske qosylady. Bul Memleket basshysynyń gaz óńdeý ónerkásibin damytý jáne keńeıtý tapsyrmasyn tolyqtaı oryndaýǵa múmkindik beredi. Halyqaralyq kontsortsıým «Sozaq» ken ornyndaǵy gazdy ıgerý úshin 7,5 mlrd dollar kóleminde ınvestıtsııa salýdy josparlap otyr. Bul jobanyń birinshi kezeńinde 3 myńǵa jýyq jumys ornyn qurýǵa múmkindik beredi. Eger joba ary qaraı tabysty júzege asyrylǵan jaǵdaıda jumys ornynyń sany 6 myńǵa deıin jetýi múmkin. Joba Qyzylorda oblysynda iske asyrylady, - dedi «Kazakh Invest» UK» basqarma tóraǵasynyń orynbasary Aıbol Arǵynǵazıev.

Onyń aıtýynsha, aldyn ala kelisimge oraı ıgerilgen gazdyń barlyǵy derlik ishki naryqqa jumsalýy múmkin. Demek, «Sozaq» ken orny sátti ıgerilgen jaǵdaıda 2,5 mln adam kógildir otyn qyzyǵyn kóredi.

Geo Jade Petroleum Corporation kompanııasynyń basqarma tóraǵasy Chen Hýanlononyń aıtýynsha, elimizde naqtylanǵan kúrdeli gaz qory 100 mlrd tekshe metrdi quraıdy. Al irisi «Sozaq» ken orny sanalady.

- Dástúrli emes gaz qory bar, ónim óndirý óte qıyn mundaı iri ken oryn barlaý úshin, jumys isteý úshin bizge Qazaqstannyń quziretti organdary tarapynan qoldaý asa qajet. Qazirgi ýaqytta «Kazakh Invest» kompanııasy men Qazaqstan Úkimeti jan-jaqty qoldaý bildirip otyr. Osyndaı qoldaýdyń, tájirıbemiz ben tehnologııalarymyzdyń arqasynda atalǵan ken ornynan gaz óndirý josparymyzdy der ýaqytynda júzege asyratyndyǵymyzǵa senimdimin, - dedi ol.

«Kazakh Invest» UK» basqarma tóraǵasy Sultanǵalı Kenjequlov «Sozaq» ken ornyn ıgerý Qazaqstan úshin múldem jańa baǵyt ekenin aıtady.

- Óıtkeni, alynýy óte kúrdeli ári dástúrli emes gaz óndiriledi. Elimizde mundaı tehnologııa joq. Jalpy, bul salada AQSh pen Qytaı ǵana álemde kósh basshy sanalady. Osy eki el ǵana kúrdeli gazdy óndirýge qajetti mundaı tehnologııalarǵa ıelik etip otyr. Jalpy, álem jaıynda aıtar bolsaq, sarapshylardyń baǵalaýyna qaraǵanda mundaı kúrdeli, ıgerilýi qıyn gaz dástúri tabıǵı gazdan 10 ese kóp, - dedi ol.

Onyń aıtýynsha, «Sozaq» ken ornyn ıgerý jobasyn júzege asyrýǵa dástúrli emes gaz óndirý salasyndaǵy amerıkalyq jáne qytaılyq eń úzdik mamandary jumyldyrylady. Sonymen qatar ol mundaı keı oryndaryn ıgerý ekologııaǵa eshqandaı zalal keltirmeıtinin aıtty.

- Ekologııa eshqandaı zııany bolmaıdy. Óıtkeni, Amerıka sońǵy 20 jylda, Qytaı 10-15 jylda mundaı gazdy tabysty túrde óndirip keledi ári ekologııaǵa eshqandaı problema bolǵan emes. Óıtkeni, ol jerde eń zamanaýı tehnologııalar qoldanylady. Munan bólek, ınvestor atalǵan tehologııalarymen bólisýge mindetti bolady, qujattarǵa qol qoıdyq. Sonymen qatar jergilikti mamandardy oqytady ári jumysshylardyń 90 paıyzy jergilikti mamandar bolady. Investor jergilikti naryqtan taýarlar men qyzmetterdi satyp alady, - dedi Sultanǵalı Kenjequlov.

Kompanııa málimetinshe, «Sozaq» jobasyn iske asyrý gazdyń ishki óndirisin aıtarlyqtaı arttyrýǵa, ońtústik óńirlerdegi ınfraqurylymdyq shekteýlerdi azaıtýǵa jáne Qazaqstanda dástúrli emes resýrstardy ıgerý úshin zamanaýı tehnologııalyq baza qalyptastyrýǵa múmkindik beredi.

- Biz «Sozaqty» jańa ındýstrııany ashatyn jáne eldiń ınvestıtsııalyq tartymdylyǵyn arttyratyn strategııalyq joba retinde qarastyramyz. Kazakh Invest ınvestorǵa tolyq súıemeldeý men bastamalardy jedel iske qosýdy qamtamasyz ete otyryp, uzaq merzimdi salymdar úshin ashyq ári boljamdy jaǵdaılar jasaıdy, — dep atap ótti kompanııadan.

Joba Qazaqstan ekonomıkasyn ártaraptandyrýǵa jáne ornyqty energetıka sektoryn damytýǵa qosylǵan mańyzdy úles bolmaq.

Aıta keteıik, ótken jyly 95 eldi mekende 350 myń adam gazǵa qol jetkizse, 2026 jyly taǵy 41 eldi mekenge gaz beriletin bolady. Máselen, eger 2024 jyldyń 1 qańtarynda el turǵyndarynyń 62 paıyzy gazben qamtamasyz etilse, 2025 jyldyń qorytyndysy boıynsha bul kórsetkish 64,2 paıyzǵa deıin ósti. Bul rette, ishki naryqta gaz tutyný kólemi únemi ósip keledi: jyl qorytyndysy boıynsha tıisti meje 20,4 mlrd tekshe metrdi qurady. Іri jobalardy júzege asyrý jáne jańa magıstraldyq gaz qubyrlaryn qosý arqasynda júzdegen eldimekende ómir súrýge qajet qolaıly jaǵdaı jasalyp, qarqyndy damýǵa múmkindik týdy.